لە ئیزمیر خوێندکارێک بەهۆی ڤیدیۆی 'هۆنینەوەی پرچ' زیندانی دەکرێت

 

 

بەگوێرەی زانیارییەکان، رۆژی پێنجشەممە 5-2-2026، هێزە ئەمنییەکانی تورکیا لە شاری ئیزمیر هەڵیانکوتاوەتە سەر ماڵی خوێندکارێک بەناوی (ئا. ک.) و دەستبەسەریان کردووە.

 

دەستگیرکردنی ئەو خوێندکارە پەیوەندی بە بڵاوکردنەوەی پۆستێکەوە هەبووە لە هەژماری تایبەتی خۆی لە تۆڕە کۆمەڵایەتییەکان، کە ڤیدیۆیەکی "هۆنینەوەی پرچ" بووە و لەگەڵیدا وێنەیەک و گۆرانییەکی داناوە.

 

دوای وەرگرتنی گوتەکانی لە بەڕێوەبەرایەتیی ئاسایش، (ئا. ک.) رەوانەی دادگە کراوە. دادگە بە تۆمەتی "بانگەشەکردن بۆ رێکخراو" (مەبەست لێی پەکەکەیە)، بڕیاری دەستگیرکردنی بۆ دەرکرد و رەوانەی زیندانی منداڵانی شاکران کرا.

 

ئەدهەم کوروش، پارێزەری خوێندکارەکە رەخنەی تووندی لە بڕیارەکە گرت و بە "دەستوەردانێکی قورس و ناهاوسەنگ" وەسفی کرد.

 

پارێزەرەکە گوتی: "بێبەشکردنی خوێندکارێک لە ئازادی بەهۆی پۆستێکی تۆڕە کۆمەڵایەتییەکانەوە، لەڕووی یاساییەوە جێگەی قبووڵ نییە. لە دادگاییکردنی منداڵاندا، پێویستە بەرژەوەندیی باڵای منداڵ پارێزراو بێت و زیندانیکردن وەک دوایین ڕێگە سەیر بکرێت، نەک یەکەم هەنگاو."

 

هەروەها راشیگەیاند، ئەو سزایە دژی بنەماکانی دەوڵەتی یاسا و ئازادیی رادەربڕینە و دەرەنجامی خراپی بۆ سەر مافی خوێندن و داهاتووی ئەو منداڵە دەبێت.

 

لەدوای بڵاوبوونەوەی دیمەنی کەژی ژنە شەڕڤانێکی کورد بە دەست چەکدارێکی سوپای عەرەبی سووریاوە، چالاکی "هۆنینەوەی پرچ" وەک سیمبولی هاوسۆزی و بەرخۆدانی رۆژئاوای کوردستان لە تۆڕە کۆمەڵایەتییەکان بڵاوبووەوە.

 

داودەزگاکانی تورکیا ئەم جۆرە چالاکییانە وەک "بانگەشەی ئایدیۆلۆژی" بۆ پەکەکە و یەپەگە دەناسێنن و لێپێچینەوەی یاسایی لەگەڵ ئەو کەسانە دەکەن کە ڤیدیۆی کەزی پۆست دەکەن.