سەرۆک بارزانی و وەزیری دەرەوەی فەرەنسا کۆبوونەوە؛ "مەترسی بەهێزبوونەوەی داعش لەئارادایە"
رووداو دیجیتاڵ
بارەگای بارزانی رایگەیاند، لە دیدارەكەدا وەزیری دەرەوەی فەرەنسا رایگەیاندووە، "سەرۆک ماكرۆن سڵاوی تایبەتی هەبووە و جەختی لە پەیوەندی و دۆستایەتی دوولایەنە و پاڵپشتیكردنی گەلی كوردستان كردووەتەوە".
ئەمڕۆ هەینی، سەرۆک بارزانی و ژان نوێل بارۆ، وەزیری دەرەوەی فەرەنسا لە هەولێر کۆبوونەوە.
بەپێی راگەیێندراوی بارەگای بارزانی، لە دیدارەكەدا كە پاتریك دورێل باڵیۆزی فەرەنسا لە عێراق و یان برێم كۆنسووڵی گشتیی فەرەنسا لە هەولێر ئامادەی بوو، وەزیری دەرەوەی فەرەنسا بە سەرۆك بارزانی راگەیاندووە، "سەرۆك ماكرۆن سڵاوی تایبەتی هەبووە و جەختی لە پەیوەندی و دۆستایەتی دوولایەنە و پاڵپشتیكردنی گەلی كوردستان كردووەتەوە. هەروەها خۆشحاڵیی خۆی بۆ سەردانی بۆ كوردستان و دیداری لەگەڵ سەرۆك بارزانی دەربڕی بە ئامانجی لەنزیكەوە ئاگاداربوون لە رەوشی سیاسیی ناوچەكە و راوێژ لەگەڵ سەركردەكانی ناوچەكە بۆ گەیشتن بە چارەسەری گونجاو بۆ گرفتەكانی ناوچەكە. وەزیری دەرەوەی فەرەنسا ئاماژەی بە هەوڵە بەردەوامەكانی سەرۆك ماكرۆن و سەرۆك بارزانی دا لە هاندانی لایەنەكان بۆ گەیشتن بە رێككەوتن لە سووریا و ئەو هەوڵانەی بەرز نرخاند. پێزانینیشی بۆ رۆڵ و پێگەی سەرۆك بارزانی هەبوو لە چارەسەركردنی كێشەكان لە عێراق و ناوچەكە. هەروەها رۆشنایی خستەسەر پەیوەندییە مێژووییەكانی فەرەنسا و گەلی كوردستان و نامەیەكی بارزانی نەمریشی پێشكەشی سەرۆك بارزانی كرد كە لە ساڵی 1967 لە لایەن بارزانی نەمرەوە بۆ ژەنەڕاڵ دیگۆل سەرۆكی فەڕەنسا نێردرابوو و لە ئەرشیڤی وەزارەتی دەرەوەی فەڕەنسادا هەڵگیرابوو و، سەرۆك بارزانی سوپاسی وەزیری دەرەوەی فەڕەنسای كرد و ئەو نامەیەی بە بەڵگەیەكی پڕبەها وەسف كرد كە سەلمێنەری پەیوەندی و دۆستایەتی لەمێژینەی گەلی كوردستان و گەلی فەڕەنسایە".
بارەگای بارزانی دەشڵێت، هەر لەو دیدارەدا بیروڕا لەبارەی بارودۆخی سیاسیی ناوچەكە و سووریا و پڕۆسەی ئاشتی لە توركیا و پڕۆسەی سیاسی عێراق و هەرێمی کوردستان ئاڵوگۆڕ كرا و سەرۆك بارزانی جەختی لەوە كردەوە كە خوازیاری ئەوەن سەرجەم كێشە و گرفتەكانی ناوچەی رۆژهەڵاتی ناوەڕاست "بە رێگەی ئاشتیانە بگاتە چارەسەر و ناوچەكە سەقامگیری بەخۆیەوە ببینێت". سەرۆك بارزانی ئاماژەی بە پڕۆسەی ئاشتی لە توركیا دا و هیوای خواست كە "پڕۆسەی ئاشتی لە توركیا بە رێگەی دیالۆگ بگاتە ئەنجام و هەمیشە پشتیوانی ئەو پڕۆسەیە بوون". سەبارەت بە رۆژئاوای کوردستان سەرۆك بارزانی هێمای بەوە دا كە "هەموو هەوڵی خۆی بەكار هێنا بۆ ئەوەی رێگری بكرێت لەوەی ناكۆكی سیاسی بكرێتە شەڕی نەتەوەیی نێوان كورد و عەرەب و هەروەها رێگری لەوە بكرێت كە پاكتاوی رەگەزی لەدژی گەلی كورد لە سووریا رووبدات". جەختیشی لەوە كردەوە كە "پشتگیری لە رێككەوتنی نێوان حكومەتی سووریا و هەسەدە دەكەین" و هیوای خواست كە ئەو رێككەوتنە ببێتە بنەمایەك بۆ سەقامگیری و چارەسەری كێشەكان لەو قۆناخەدا.
لەبارەی مەترسیی سەرهەڵدانەوەی تیرۆر، بارەگای بارزانی ئاماژە بەوە دەدات، سەرۆك بارزانی ئەوەی خستەڕوو كە "مەترسی بەهێزبوونەوەی داعش لەئارادایە و پێویستە میكانیزمێكی گونجاو و هەماهەنگیی لەنێوان لایەنەكان هەبێت بۆ رووبەڕووبوونەوەی هەڕەشەی تیرۆر و داعش".
لە بەشێكی دیکەی ئەو دیدارەدا، بەگوێرەی بارەگای بارزانی، "سەرۆك بارزانی سوپاسی فەڕەنسای كرد كە هەردەم لە كاتە سەختەكاندا پاڵپشتی گەلی كوردستان بووە". وەزیری دەرەوەی فەڕەنساش جەختی لەوە كردەوە كە وڵاتەكەی "هەمیشە سۆزێكی تایبەتی بۆ دۆزی گەلی كوردستان هەبووە لە رۆژهەڵاتی ناوەڕاست و پاڵپشتی ئەوەیە گەلی كوردستان بە رێگەی ئاشتیانە بە مافەكانی خۆی شاد ببێت و هەروەها وڵاتەكەی لەگەڵ پاراستنی هەرێمی كوردستان و بەردەوامیی هەرێمی كوردستانێكی بەهێز دایە".