پارێزگاری سلێمانی بۆ کەسوکاری قوتابییان: بۆ دەستپێکردنەوەی خوێندن پشتیوانمان بن

 

هەڤاڵ ئەبوبەکر، پارێزگاری سلێمانی لە فەیسبووک بڵاویکردەوە، پشتیوانی ئەنجوومەنی خۆجێی سلێمانی بۆ دەستپێکردنەوەی پرۆسەی خوێندن پێشاندراوە. 

 

هەڤاڵ ئەبوبەکر دەڵێت، لە کۆبوونەوەکەدا داوا لە کەسوکاری خوێندکاران و قوتابییان کراوە، پشتیوانی ئەم هەنگاوانەبن بۆ ئەوەی "بەشێوەیەکی شایستە" پرۆسەی خوێندن دەستپێبکاتەوە. 

 

هەروەها دواتر لە پۆستێکی دیکەدا لە تۆڕی کۆمەڵایەتیی فەیسبووک، هەڤاڵ ئەبوبەکر داوایەکی ئاراستەی مامۆستایانی ناڕازی کرد و گوتی، "داوا لە مامۆستایانی خۆشەویست و پێشەنگ دەکەین، لەگەڵ بەردەوامبونیان لە داکۆکیکردن لە مافە ڕەواکانیان، دەست بە وەرزی نوێی خوێندن بکەنەوە و سەدان هەزار خوێندکار و قوتابی لەم دۆخە ناهەموارە رزگار بکەن."

 

پارێزگاری سلێمانی هەروەها پەیامی ئاراستەی خوێندکاران کرد و گوتی، "داوا لە کەسوکاری خوێندکاران و قوتابییان و خودی خوێندکاران و قوتابییان دەکەین، بە گوڕوتینێکی نوێوە دەست بە خوێندن بکەنەوە و خۆیان بە پشتیوانی سەرەکیی مافی مامۆستایان و تەواوی هاووڵاتییان بزانن."

 

ئەو گوتانەی هەڤاڵ ئەبوبەکر لە کاتێکدایە کە نزیکەی چوار مانگە و لە 13-09-2023ـەوە ساڵی خوێندنی 2023 - 2024 دەستیپێکردووە، بەڵام مامۆستایان لە پەروەردەکانی سنووری پارێزگاکانی سلێمانی و هەڵەبجە و هەردوو ئیدارەی سەربەخۆی گەرمیان و راپەڕین و پەروەردەی کۆیە بایکۆتی دەوامیان کردووە.

 

رۆژی یەکشەممە، 07-01-2024، دوای نووسراوی وەزارەتی پەروەردەی هەرێمی کوردستان هات کە تێدا ئاماژەی بەوەکردبوو، پاش هەموارکردنەوەی یاسای بودجەی گشتیی عێراق و ناردنی پارە بۆ هەرێمی کوردستان، داواکاریی مامۆستایان جێبەجێ دەکەن، پەروەردەکانی سلێمانی، راپەرین، گەرمیان و هەڵەبجە نووسراوێکیان ئاراستەی مامۆستایان کرد و داوایان کرد بگەڕێنەوە ناوەندەکانی خوێندن. هەمان رۆژ ئەنجوومەنی مامۆستایانی ناڕازی وەڵامی وەزارەتی پەروەردە و بەڕێوەبەرایەتیی شارەکانیان دایەوە و رایانگەیاند، "مەرجدارکردنی جێبەجێکردنی داخوازییەکانمان و بەستنەوەی بە هەمواری نادیاری یاسای بودجەی عێراقەوە خۆدزینەوەیە لە جێبەجێکردنیان و ناتوانین و باوەڕ بەوە ناکەین حکومەت نییەتی چارەسەرکردنی گرفتەکانی هەبێت."

 

ئەنجوومەنی مامۆستایانی نارازی مامۆستایانیان ئاگادارکردەوە کە رۆژی دووشەممە، 08-01-2024 خۆپێشاندانی سەرتاسەریی ئەنجامدەدەن وەکو درێژەدان بە خەباتی مەدەنییان. 

 

لە هەرێمی کوردستان نزیکەی ملیۆنێک و 800 هەزار قوتابی هەن؛ بەهۆی بایکۆتی مامۆستایانەوە لە سنووری پارێزگاکانی سلێمانی و هەڵەبجە، هەروەها ئیدارەکانی گەرمیان، راپەڕین و پەروەردەی کۆیە، نزیکەی 700 هەزار قوتابی، کە دەکاتە نزیکەی ٪40ـی کۆی قوتابییان دەوامیان نەکردووە. تاوەکو ئێستا چارەنووسی خوێندن لەو ناوچانە بە نادیاری ماوەتەوە.