سێ هاووڵاتی لە رووداوێکی هاتووچۆدا لە پارێزگای سنە گیانیان لەدەستدا

رۆژی هەینی، 8ـی ئاداری 2024، عیسا گەوهەری، بەڕێوەبەری پۆلیسی رێگەوبانی پارێزگای سنە رایگەیاند، "لە رێگەی نێوان قوروە - هەمەدان بە دووری 18 کیلۆمەتر لە شاری قوروە، ئۆتۆمبێلێکی بارهەڵگری بچووک لەگەڵ ئۆتۆمبێلێکی تایبەت پێکیاندادا".

 

بە گوتەی بەڕێوەبەری پۆلیسی رێگەوبانی سنە، شۆفێری بارهەڵگرەکە و دوو لە سەرنشینەکانی دەستبەجێ گیانیان لەدەستدا و شۆفێری ئۆتۆمبێلە تایبەتەکەش کە لە جۆری پیژۆ 405 بووە، لەگەڵ سێ لە سەرنشینەکانی برینداربوون.

 

لەبارەی هۆکاری رووداوەکە، عیسا گەوهەری دەڵێت، "ئۆتۆمبێلە بارهەڵگرەکە ویستوویەتی لە ئۆتۆمبێلەکەی پێش خۆی دەربچێت و لەکاتی دەرچوونیدا لەگەڵ پێژۆکە کە لە بەرامبەرەوە هاتووە، بەریەککەوتوون".

 

رێگەی نێوان قوروە – هەمەدان 83 کیلۆمەترە و بەشێکی رێگەکە یەکسایدە، بەهۆی خراپی رێگەوبانەکە و کەمی هێماکانی هاتووچۆ، ساڵانە رووداوی هاتووچۆی زۆری تێدا روودەدات.