لە پارێزگای لوڕستان هۆشداری لەبارەی وشکەساڵی دەدرێت

 

 

ئەحمەد گودەزری، جێگری سەرۆکی رێکخراوی ناوچەیی ئاو و ئاوەڕۆی پارێزگای لوڕستان باس لە مەترسییەکانی کەمبارانیی ئەم ساڵ لەو پارێزگایە دەکات و دەڵێت، بڕی ئاوی بەنداوەکانی لوڕستان 75 لەسەد کەمیکردووە و تەنیا بەو 25 لەسەد ئاوەی لە بەنداوەکاندا ماون، دەتوانن ئاوی خواردنەوەی پارێزگاکەی پێ دابین بکەن. 

 

دەشڵێت، کەمبارانی بووەتە هۆی وشکبوونی بەنداوەکانی کەزنار و خانئاوا لە لوڕستان و بەنداوی حەوزیانی ئەلیگودەرزیش لە دۆخێکی خراپدایە و ئەگەری هەیە تاوەکو هاوین بە تەواوی وشک بکات.

 

بەگوتەی ئەحمەد گودەزری، ئەم ساڵ لە پارێزگای لوڕستان بارانبارین بەراورد بە ساڵی رابردوو 42 لەسەد و بەراورد بە درێژماوەش 56 لەسەد کەمیکردووە و دۆخی رووبار و بەنداوەکانی ئەو پارێزگایە بە تەواوی کەوتوونە دۆخی هۆشدارییەوە. "ئەمساڵ پارێزگای لوڕستان چوارەمین ساڵی وشکەساڵییەتی و پێشبینی دەکرێت هاوینی داهاتوو، دابینکردنی ئاوی خواردنەوە، کشتوکاڵ و پیشەسازی، بە تەواوی کێشەی لێبکەوێتەوە."

 

ئەحمەد گودەزری باس لە قەدەخەکردنی ئەو بەرهەمە کشتوکاڵییانە دەکات کە پێویستییان بە ئاوی زۆرە و دەڵێت، رێگە بە جووتیاران نادرێت برنج، پەتاتە و چۆنەر بچێنن، چونکە بەرهەمهێنانیان پێویستی بە ئاوی زۆرە و لە وشکەساڵیدا ئەو ئاوە دابین ناکرێت.