هاتووچۆی هەولێر: رۆژانە پشکنین بۆ 250 ئۆتۆمبێلی 'مەلیکە' دەکەین

 

ئەو پشکنینە لە 30ی ئاداری 2023 دەستیپێکردووە و تاوەکو 30ی نیسان بەردەوام دەبێت، عەقید فازڵ حاجی دەڵێت: "تائێستا نازانرێت ئەو پشکنینە بۆ چ مەبەستێکە."      

 

گوتەبێژی هاتووچۆی هەولێر گومان دەکات بەشێک لەو ئۆتۆمبێلانە دوای بڵاوکردنەوەی ئاگادارییەکەی ئەوان هێنرابنە کوردستان و دەڵێت: "بەشێک لەو ئۆتۆمبێلانە لە پشکنینی یەکەم تۆمار نەکراون." گوتیشی: "بڕیار نەبوو ئەو جۆرە ئۆتۆمبێلانە بپشکنین کە پێشتر نەپشکنرابوون، بەڵام خاوەنی بەشێکیان لە رێگەی دوورەوە هاتبوون، بۆیە پشکنین بۆ ئۆتۆمبێلەکانی ئەوانیش کرا." 

 

پشکنینی ئۆتۆمبێلەکان بە ئامێرێک دەکرێت، کە تەنیا لە شاری هەولێر هەیە، بۆیە ئەوانەی خاوەنی ئەو ئۆتۆمبێلەن لە هەر شارێکی هەرێمی کوردستان بن، دەبێت سەردانی هەولێر بکەن.      

 

سەبارەت بە ژمارەی ئۆتۆمبێلەکانی مەلیکە لە هەرێمی کوردستان، عەقید فازڵ حاجی گوتی: "بە دروستی ژمارەکەیان نازانرێت، چونکە پشکنینی یەکەم گشتی بوو، بۆ سەرجەم ئۆتۆمبێلە بێ سەرەتاکان بوو، 19 هەزار ئۆتۆمبێل تۆمارکران کە مەلیکەکان بەشێکیان بوون."