سەرۆکی یەکێتیی مامۆستایان: مەترسیی هەیە خوێندنی ئەم ساڵ لە سلێمانی و هەڵەبجە بفەوتێت

 

13ی ئەم مانگە، دوو مانگ بەسەر دەستپێکردنی وەزری ئەم ساڵی خوێندن تێدەپەڕێت، بەڵام مامۆستایانی پارێزگاکانی سلێمانی و هەڵەبجە و هەردوو ئیدارەی سەربەخۆی رانیە و گەرمیان بایکۆتی دەوامیان کردووە. 

 

رۆژی هەینی، 9-11-2023، عەبدولواحید محەممەد، سەرۆكی خولیی یەكێتیی مامۆستایانی كوردستان بە تۆڕی میدیایی رووداوی راگەیاند: "هەوڵێک لە هەموو لایەنەکانەوە هەیە، بۆ ئەوەی پرۆسەی خوێندن لە قوتابخانەکانی سنووری پارێزگاکانی سلێمانی و هەڵەبجە دەستپێبکاتەوە، ئومێد دەکەین بە هەموومانەوە بتوانین سەریبخەین، چونکە راوەستانی پرۆسەی خوێندن زیانێکی گەورەی هەیە و مەترسیدارە."

 

عەبدولواحید محەممەد رەتیکردەوە کە لەلایەن رێکخراوی یونسێف یان رێکخراوەکانی دیکە، سەقفێکی زەمەنی دانرابێت بۆ هەژمارنەکردنی خوێندنی ئەم ساڵ لە سنووری ئەو ناوچانەی بایکۆتیان تێدایە و گوتی: "ئەو رێکخراوانە تەنیا راوێژ دەدەن و دەستوەردان لە پرۆسەی خوێندن ناکەن، بەڵام ئەوەی هەیە لە هەرێمی کوردستان ئەو رێنمایی و یاسا بەرکارانەیە کە لە هەرێمی کوردستان هەیە، لەنێویاندا یاسای وەزارەتی پەروەردە."

 

لە سنووری پارێزگەی سلێمانی نزیکەی 65 بۆ 70 هەزار مامۆستا دەوام ناکەن و بایکۆتیان کردووە، مامۆستایانی میلاک داوای مووچە دواکەوتووەکانیان دەکەن، هەرچی مامۆستایانی وانەبێژن، داوای دامەزراندنی هەمیشەیی دەکەن.

 

سەرۆكی خولیی یەكێتیی مامۆستایانی كوردستان هۆشداری دا لە درێژەکێشانی بایکۆتی ناوەندەکانی خوێندن لەلایەن مامۆستایانەوە و گوتی: "ئەگەر خوێندنی وەرزی یەکەمی ئەم ساڵ نەکرێت، تاقیکردنەوەی وەرزی یەکەمیش ناکرێت کە سەرەتای مانگی یەکی ساڵی داهاتووە، ئیدی مەترسی هەژمارنەکردنی ئەم ساڵی خوێندنی ئەو ناوچانە دروستدەبێت و ئەگەر ئەوە روویدا ئەو کات لە دەسەڵاتی وەزارەتی پەروەردەش نامێنێت و دەبێت داوا لە ئەنجوومەنی وەزیران بکرێت چارەسەرێک بۆ ئەم ساڵی خوێندن بدۆزرێتەوە."

 

لە هەرێمی کوردستاندا نزیکەی ملیۆنێک و 800 هەزار قوتابی هەن؛ بەهۆی بایکۆتی مامۆستایانەوە لە سنووری پارێزگاکانی سلێمانی و هەڵەبجە، هەروەها ئیدارەکانی گەرمیان و راپەڕین و پەروەردەی کۆیە، نزیکەی 700 هەزار قوتابی کە دەکاتە نزیکەی 40٪ـی کۆی قوتابیان، تائێستا دەوامیان نەکردووە.

 

ئەو بەرپرسەی یەکێتیی مامۆستایان باسی لەوەکرد، لە هەندێک لە قوتابخانەکانی سلێمانی و هەڵەبجە دەوامی پۆلی شەش دەکرێت، بەڵام بە رێکی نییە، گوتیشی: " پچڕپچڕی لە خوێندن لەگەڵ راوەستانی خوێندن جیاوازی نییە."

 

بەپێی ساڵنامەی خوێندنی 2023-2024ـی وەزارەتی پەروەردە، پڕۆسەی خوێندن لە هەرێمی کوردستان لە رۆژی 13-9-2023 دەستپێدەکات و لە رۆژی 3 تاوەکو 15ـی مانگی کانوونی دووەمی 2024، تاقیکردنەوەی وەرزی یەکەم بەڕێوەدەچێت، بەپێی ساڵنامەکە تاوەکو ئێستا لەکۆی 15 هەفتەی خوێندن 10 هەفتەی رۆیشتووە.