بەنداوەکانی ئامەد پڕ ئاو بوون و مەترسیی وشکەساڵی نەما

 

لەگەڵ دەستپێکردنی مانگی شوبات، چەند شەپۆلێکی بارانبارین ئامەدی گرتووەتەوە؛ ئەوەش لەکاتێکدایە لە مانگی کانوونی دووەمی ئەمساڵدا شەپۆلێکی بەفربارین رووی لە شارەکە کردبوو.

 

بەهۆی ئەو شەپۆلە بەفر و بارانەوە، ئێستا بەنداوەکانی ئامەد پڕ ئاو بوون. جگە لەوەی زەویی ناوچەکە تێرئاو بووە، ئاستی ئاوی ژێرزەویش زیادی کردووە، بەمەش مەترسیی وشکەساڵی کە چەند ساڵێک بوو هەڕەشەی لەو شارەی باکووری کوردستان دەکرد، رەوییەوە.

 

هاوکات بەڕێوەبەرایەتیی کەشناسی هۆشداریی جۆری "زەرد"ی بۆ پارێزگاکانی ئامەد، وان، شرنەخ، جۆلەمێرگ، سێرت، هاتای و ئێلهـ بڵاوکردەوە و پێشبینی دەکات شەپۆلێکی دیکەی بارانبارین ناوچەکە بگرێتەوە.

 

بەگوێرەی پێشبینییەکانی کەشناسی، شەپۆلەکە لە ئەمڕۆ چوارشەممە 11-02-2026 دەستپێدەکات و تاوەکو رۆژی یەکشەممە بەردەوام دەبێت.