چەند بنکە و بارەگایەکی ئێران لە مەریوان بۆردوومان کران.

 

بەگوتەی شایەتحاڵان، لەم هێرشانەدا فەرماندەیی پاسەوانی سنوور، مەیدانی سوپا، بارەگای سوپا لە گوندی چاوگ، بارەگای سوپا لە بەردەڕەشەی نزیک باشماغ، تاوەری دەنگ و رەنگی ئێران و چەند تاوەرێکی سنووری لە کێوی قەڵای مەریوان بۆردوومان کراون.

 

دوای نزیکەی رۆژێک لە راوەستانی هێرشەکان بۆسەر شارەکانی رۆژهەڵاتی کوردستان، ئەمڕۆ چوارشەممە چەندین بنکە و بارەگای سەربازی لە رۆژهەڵاتی کوردستان بۆردوومان کران.

 

پاشنیوەڕۆی ئەمڕۆ ، بنکەیەکی پۆلیس لە شاری سەقزی رۆژهەڵاتی کوردستان کرایە ئامانج و دەنگی تەقینەوەیەکی بەهێز لە ناوچەکە بیسترا.

 

هاوکات هەر بەپێی زانیارییەکان، کاتژمێر 1:45 خولەکی پاشنیوەڕۆی ئەمڕۆ، هێرش کراوەتە سەر بنکەی پۆلیسی 12ـی سەقز کە دەکەوێتە گەڕەکی  زانکۆ و لە هەردوو گوندی ئایەنان و سونەتە بنکەی سوپای پاسدارن و بنکەیەکی پۆلیس لەسەر رێگەی سەقز - سنە کرانەتە ئامانج

 

جەنگی نێوان ئەمریکا و ئیسرائیل لەگەڵ ئێران لە 28ـی مانگی رابردووەوە دەستیپێکرد، دواتریش لە هەمان رۆژ ئێران لە وڵاتانی ناوچەکە هێرشیکردە سەر بنکە و بەرژەوەندییەکانی ئەمریکا. ئەنجامی هێرشەکانی یەکەم رۆژ، کوژرانی عەلی خامنەیی، رێبەری کۆماری ئیسلامیی ئێران بوو. 

 

تاوەکو ئێستا ئاسۆیەک بۆ کۆتاییهاتنی جەنگەکە دیار نییە کە پێی ناوەتە رۆژی 12ـەیەمەوە و لە تەواوکردنی دوو هەفتە نزیک دەبێتەوە.