لە پێنجوێن کەسێک بەهۆی پێوەدانی هەنگەوە گیان لەدەستدەدات

 

رۆژی هەینی، 11-8-2023، لوقمان لەتیف، گوتەبێژی نەخۆشخانەی گشتیی شەهیدان لە پێنجوێن بە تۆڕی میدیایی رووداوی راگەیاند: "ئەمڕۆ کاژێر 12:00ـی نیوەڕۆ تەرمی کەسێک گەیێندرایە بەشی فریاکەوتنی نەخۆشخانەی گشتیی شەهیدان لە قەزای پێنجوێن، کە بەپێی پشکنینەکان و گوتەی ئەو کەسانەی لەگەڵیدابوون بەهۆی پێوەدانی دوو هەنگەوە گیانی لەدەستداوە."

 

لوقمان لەتیف گوتی: ئەو کەسە کە لەدایکبووی ساڵی 1975ـە، لەگەڵ چەند کەسێکدا بووە لە پشتی گوندی گۆخەڵانی ناحیەی گەرمکی قەزای پێنجوێن خەریکی هەنگ بوون و بۆ هەنگوین گەڕاون، بەڵام بەهۆی پێوەدانی دوو هەنگەوە و زۆری هەستیاریی ئەو کەسە بەرامبەر بە هەنگەکان گیانی لەدەستداوە."

 

گوتەبێژی ئەو نەخۆشخانەی قەزای پێنجوێن ئاماژەی بۆ ئەوەشکرد، هەر دوێنێ کەسێکی دیکە بەهۆی پێوەدانی هەنگەوە و بەهۆی خراپیی تەندروستییەوە رەوانەی نەخۆشخانەی سلێمانی کراوە، دەشڵێت: "لەماوەی سێ رۆژدا زیاتر لە 30 کەس بەهۆی پێوەدانی هەنگ و دووپشک و مار هاتوونەتە بەشی فریاکەوتنی نەخۆشخانەکەمان و کاری پێویستیان بۆ کراوە."

 

نەخۆشخانەی گشتی شەهیدان لە قەزای پێنجوێن لە راگەیێندراوێکدا لەبارەی رووداوەکانی پێوەدانی هەنگەوە رایگەیاندووە: "داوا لە هەنگەوانان و برا جووتیارەکان و شاخەوانان دەکەین بە وریایی مامەڵە بکەن و لەکاتی پێوەدان، کەسەکە بە زوویی بیگەیێننە نزیکترین نەخۆشخانە."