چیرۆکی ئەو هاونیشتمانییەی لە کەمپێکی پەنابەرانی یۆنان هەڵات و گیانی لەدەستدا

 

 

محەممەد تۆفیق، ئەو مێرمنداڵە تەمەن 17 ساڵانەی لە ساڵی 2019دا بە هیوای ژیانێکی باشتر رووی لە ئەورووپا کرد، بووە قوربانی یەکێک لە چیرۆکەکانی کۆچ. رەنج پشدەری، چالاکڤانی بواری کۆچبەران کە بەدواداچوونی ئەم کەیسە کردووە، لە بووڵتەنی کاژێر 17:00ی تۆڕی میدیایی رووداو کە (شەهیان تەحسین) پێشکێشی دەکات، وردەکاریی ئەو گەشتەی ئاشکرا کرد کە کۆتاییەکەی "گۆڕستانی بێناونیشانەکان" بوو.

 

دوای ئەوەی بنەماڵەی محەممەد داوای هاوکاری لە رەنج پشدەری، چالاکڤانی بواری کۆچبەری کرد، پشدەری وێنەی محەممەدی لە فەیسبووکی خۆی بڵاوکردەوە و گوتی: "هەر کەسێک ئەم کوڕە دەناسێت، با پەیوەندیم پێوەبکات". 

 

گەنجێک بە ناوی (کاروان) کە ئێستا لە بەلجیکایە، پەیوەندی بە رەنج پشدەرییەوە کرد و پێی گوت: "ئەو کاتەی تەمەنم 12 ساڵ بوو، لەگەڵ محەممەد لە یۆنان لە کەمپی منداڵان بووم. حەوت ساڵە وێنەکانی محەممەدم لای خۆم وەک ئەمانەت پاراستووە تاوەکو بیانگەیێنمە خێزانەکەی." 

 

بە قسەی کاروان، محەممەد لە کەمپی (پیلاکیۆ) بووە لە نزیک سنووری تورکیا. ئەو هاونیشتمانییە بۆ ئەوەی دەرفەتی مانەوەی زیاتر بێت، خۆی وەک هاووڵاتییەکی ئێرانی ناساندووە و شەوێک وێنەکانی خۆی داوەتە کاروان و پێی گوتووە: "ئەگەر شتێکم بەسەرهات، ئەم وێنانە بگەیێنەرە دەستی کەسوکارم تاوەکو بزانن لە ژیاندا ماوم یان چیم بەسەر هاتووە."

 

رەنج پشدەری بۆ پشتڕاستکردنەوەی زانیارییەکان، گەشتێکی 16 کاژێری بە پاس کردووە تا گەیشتووەتە کەمپی پیلاکیۆ و دەڵێت: "کەمپەکە وەک شارێکی گەورەی داخراو وایە، چواردەوری بە تەلی دڕکاوی و دیواری بەرز گیراوە."

 

محەممەد چی دیکە بەرگەی ژیانی نێو کەمپەکەی نەگرتووە، هەربۆیە پلانی بۆ راکردن داناوە. بۆ ئەوەی جەستەی بە تەلی دڕکاوی کەمپەکە بریندار نەبێت، پێنج بۆ شەش پانتۆڵ و چەندین چین جلی لەسەر یەک لەبەر کردووە. ئەو هاونیشتمانییە بەسەر تەلەکە و دواتر دیوارە بەرزەکەدا بازی داوە.