نوێنەری پێشمەرگە لە ئۆپەراسیۆنە هاوبەشەکان: رێوشوێنەکانی دامەزراندنی دوو لیوا هاوبەشەکە دەستپێدەکات

 

رۆژی دووشەممە 12-6-2023، عەمید روکن عادل جەبار زەنگەنە، نوێنەری وەزارەتی پێشمەرگە لە فەرماندەیی ئۆپەراسیۆنە هاوبەشەکانی عێراق بە تۆڕی میدیایی رووداوی راگەیاند: "دوای ئەوەی رەشنووسی بودجەی عێراق لە پەرلەمان پەسندکرا، چاوەڕوانین لەلایەن سەرۆککۆمارەوە واژۆ بکرێت بۆ ئەوەی ببێت بە یاسا و دوای ئەوە دەست بە رێکارە کردەییەکانی دامەزراندنی ئەو دوو لیوا هاوبەشە لەنێوان هێزەکانی پێشمەرگە و سوپای عێراق دەکرێت."

 

عەمید روکن عادل جەبار زەنگەنە باسی رێوشوێنەکانی دامەزراندنی ئەو دوو لیوایەی کرد و گوتی: "سەرەتا دەست دەکرێ بە بانگکردنی ئەو کەسانەی لەو دوو لیوایەدا دەبن، پاشان بەسەر بنکەکانی مەشق و راهێنان دابەشدەکرێن بۆ ئەوەی راهێنانیان پێبکرێت، دوای ئەوەی پڕچەک دەکرێن و سەرجەم پێداویستییەکانیان بۆ دابیندەکرێت، بەپێی پێویستی بەسەر ئەو دوو لیوایە دابەشدەکرێن و لەو ناوچانەی بۆشایی ئەمنییان تێدایە بڵاودەکرێتەوە."

 

نوێنەرەکەی وەزارەتی پێشمەرگە باسی لەوەشکرد ئەو دوو لیوا هاوبەشە ناویان لیواکانی تایبەتی یەک و دوو دەبێت.

 

لەبارەی مەرجەعیەتی ئەو هێزانەش، روونیدەکاتەوە: "ئەو دوو لیوایە وەکو جموجۆڵ و بڵاوبوونەوە لەسەر فەرماندەیی هێزە هاوبەشەکانی عێراق دەبن و وەکو مووچە و پڕچەککردن و شتی دیکە لەسەر وەزارەتی بەرگریین." 

 

بەپێی ئەو رێککەوتنەی مانگی ئابی ساڵی 2021 لە نێوان وەزارەتی پێشمەرگە و وەزارەتی بەرگریی عێراقدا کرا، هەردوو لیوا هاوبەشەکە لەو ناوچانە بڵاودەبنەوە، کە ناوچەی بۆشایی ئەمنین لەنێوان هێزەکانی پێشمەرگە و سوپای عێراق، بەتایبەت بۆ رێگری لەو هێرش و پەلامارانەی داعش لەو ناوچانە ناوەناوە دەیکات. لیوایەکیان لە خانەقینەوە تاوەکو پردێ بڵاودەبنەوە، لیواکەی دیکەش لە سنووری پردێ بەدواوە تاوەکو دەگاتە سنووری نێوان عێراق و سووریا.

 

ژمارەی ئەندامانی دوو لیواکە نزیکەی 7500 کەس دەبن، هەر لیوایەک لە چوار فەوج پێکهاتوون کە نیوەی لە پێشمەرگە دەبێت و نیوەکەی دیکەیشی لە سوپای عێراق و سەر بە فەرماندەیی ئۆپەراسیۆنە هاوبەشەکانی عێراق دەبن، لەلایەن وەزارەتی بەرگریی عێراقیشەوە پێداویستی و مووچەیان بۆ دابین دەکرێت.

 

نزیکەی 560 کیلۆمەتر بۆشایی ئەمنی لەنێوان هێزەکانی پێشمەرگە و سوپای عێراقدا هەیە، زۆرینەی دوای رووداوەکانی 16ی ئۆکتۆبەری ساڵی 2017 دروستبوون و بە هۆکاری سەرەکیی هێرشە ناوبەناوەکانی چەکدارانی داعش دادەنرێن بۆ سەر هێزەکانی پێشمەرگە و سوپای عێراق. 

 

هێزە هاوبەشەکە لە لیوای 20ی پێشمەرگە و لیوای 66ی سوپای عێراق پێکدێن، سەرپەرشتیاری یەکێک لە لیواکان کورد دەبێت و جێگرەکەی لەنەتەوەی عەرەب دەبێت، ئەوی دیکەشيان فەرماندەکەی عەرەب دەبێت و جێگرەکەی لە نەتەوەی کورد دەبێت.