لە مەرەش ئاگر لە دارستانێکدا کەوتەوە و کۆنترۆڵکرا

 

ئاگرکەوتنەوەکە لە دارستانی شارۆچکەی 12ی شوبات کەوتەوە و شەوی رابردوو بەرگریی شارستانیی مەرەش لە کەوتنەوەی ئاگادار کرایەوە. 

 

تیمەکان لە یەکەمین هەوڵیاندا نەیانتوانی ئاگرەکە کۆنترۆڵ بکەن و هەربۆیە تیمی دیکەی بەرگریی شارستانی گەیشتنە دارستانەکە و دواجار بەیانیی ئەمڕۆ چوارشەممە 12-7-2023 کوژێنرایەوە.

 

تاوەکو ئێستا هۆکاری کەوتنەوەی ئاگرەکە نەزانراوە، بەڵام بەگوێرەی لێکۆڵینەوە سەرەتاییەکان، سەرەتا لە زەوییەکی حەوت دۆنمییەوە دەستیپێکردووە و دواتر تەشەنەی سەندووە.

 

بەرپرسانی بەرگریی شارستانیی مەرەش دەڵێن، هەبوونی با هۆکارێک بووە کە وایکردووە ئاگرەکە بە ئاسانی کۆنترۆڵ نەکرێت.

 

بەگوێرەی ئامارەکانی وەزارەتی کشتوکاڵ و دارستانی تورکیا، ساڵی 2022 لە باکووری کوردستان و تورکیادا دوو هەزار و 43 ئاگر کەوتوونەتەوە و بەهۆیانەوە 12 هەزار و 384 دۆنم دارستان سووتاون.