گەشتەکانی فڕۆکەخانەی کرماشان لە 70 گەشتەوە بۆ 15 گەشت کەمبوونەتەوە

 

فڕۆکەخانەی کرماشان نزیکەی 10 مانگە نۆژەن دەکرێتەوە، بەڵام موجتەبا بەیاتی، بەرپرسی پەیوەندییەکانی فڕۆکەخانەی شاری کرماشان، دەڵێت: "کەمبوونەوەی گەشتەکان پەیوەندیی بە نۆژەنکردنەوەی فڕۆکەخانەکەوە نییە."

 

بەگوتەی موجتەبا بەیاتی، ئێستا لە ماوەی هەفتەیەکدا 15 گەشت لە فڕۆکەخانەی کرماشانەوە دەکرێت، بەڵام پێشتر هەفتانە 70 گەشتی هەبووە و گەورەترین فڕۆکەخانەی رۆژهەڵاتی کوردستان بووە.

 

بەرپرسی پەیوەندییەکانی فڕۆکەخانەی کرماشان ئاماژە بەوە دەکات: "فڕۆکەخانەی کرماشان بۆ گەشتی شەوانە و گەشتە فڕۆکە گەورەکان کێشەی هەیە، بەڵام بۆ فڕۆکەکانی دیکە کێشەی نییە و توانای دابینکردنی خزمەتگوزاریی هەیە."

 

بەگوتەی موجتەبا بەیاتی، نۆژەنکردنەوەی فڕۆکەخانەی کرماشان هاوینی ساڵی داهاتوو تەواو دەبێت.

 

ساڵی پار لە فڕۆکەخانەی کرماشانەوە نزیکەی 271 هەزار کەس گەشتیان کردووە و 2 هەزارو  970 گەشت بۆ شارەکانی تاران، مەشهەد، کیش، شیراز و عەسەلویە کراوە. 

 

فڕۆکەخانەی کرماشان ساڵی 1971 دروستکراوە و خەڵکی پارێزگاکانی دەوروبەری کرماشانیش کەڵکیان لێوەرگرتووە. بەڵام ئێستا بەهۆی نۆژەنکردنەوەی تەنیا کەڵک لە 20٪ تواناکانی وەردەگیرێت.