سوپای پاسداران: ژێرخانی سەربازیی ئیسرائیل و بنکەکانی ئەمریکامان لە ناوچەکە کردنە ئامانج

 

 

بە گوێرەی راگەیێندراوەکە، ئەم ئۆپەراسیۆنە لە لایەن هێزی ئاسمانیی سوپا، هێزی دەریایی، ئەرتەشی ئێران و حیزبوڵڵای لوبنان ئەنجام دراوە و تێیدا ژمارەیەکی زۆر لە مووشەکی وردپێکی خەیبەرشکێن و فڕۆکەی بێ فڕۆکەوان بەکار‌هێندراون.

 

بەپێی راگەیێندراوەکە، سەرەکیترین ئەو شوێنانەی لە ئۆپەراسیۆنەکەدا کراونەتە ئامانج ئەمانەن: 

 

لە نێوخۆی ئیسرائیل؛ ژێرخانی فەرماندەیی باکووری ئیسرائیل، ناوەندە سەربازییەکانی حەیفا و قەیساریە، کۆمەڵگەی پیشەسازیی حۆلۆن و کۆمەڵگە نیشتەجێبووەکانی زەرعیت و شلومی.

 

بنکەکانی ئەمریکا؛ راگەیێندراوەکە دەڵێت، دوای ئاگادارکردنەوەیان بۆ چۆڵکردنی ناوچەکە، هەریەکە لە بنکەی زەفرە لە ئیمارات و بنکەی هەولێر لە هەرێمی کوردستان کراونەتە ئامانج.

 

سوپای پاسداران ئاماژەی بەوەش کردووە کە ئەم هێرشانە وەک وەڵامێک بوون بۆ بۆردوومانکردنی ناوچەکانی نزیک لە رێپێوانی رۆژی قودس لە تاران.