درۆن و مووشەکەکانی ئێران بە ئاسمانی کوردستاندا تێپەڕین و بەشێکیان تێکشکێندران
رووداو دیجیتاڵ
لە ناوچە جیاوازەکانی هەرێمی کوردستان دەنگی تەقینەوە و درۆن بیستراو و کۆنسوڵخانەی ئەمریکاش لە هەولێر زەنگی ئاگادارکردنەوەی لێدا. هاوکات سیستمی بەرگری لە کۆنسوڵخانەکە کەوتووەتەکار و چەند درۆنێکی تێکشکاندووە.
ئەو ناوچانەی دەنگی لێ بیستراوە بریتین لە سلێمانی، هەولێر، هەڵەبجە، رانیە، سۆران، شیلادزێ، ئاکرێ، دەڤەری برادۆست، شێخان، هەریر و چەند ناوچەیەکی دیکە.
ئەندام جەبار، پەیامنێری رووداو ئاماژەی بەوەکرد، لە سنووری ئیدارەی سۆران درۆن چیای کۆڕەکی کردووەتە ئامانج.
ئەو دەنگ و رووناکییانەی بیندران و بیستران، لە ماوەی چەند خولەکێکدا بوون و وا دەردەکەوێت، مووشەک و درۆنەکان لە رۆژهەڵاتی کوردستانەوە هەڵدرابن بەتایبەتی لە سنوورەکانی پیرانشار و بەگم قەلای سەر بە نەغەدەوە.
مووشەکێکی ئێران کە لە ئاسمانی هەولێر خرایەخوارەوە، لە گوندی کۆرەکی گەورە کەوتەخوارەوە و شایەتحاڵێک لە شوێنی کەوتنەخوارەوەی مووشەکەکە بە رووداوی راگەیاند، "دەنگێکی بەرزی هەبوو و کاتێک دەنگەکە هات، خەڵکی گوندەکە تەقەیان کرد. ئەو مووشەکەش بە دووریی نزیکەی 50 مەتر لە گوندەکە کەوتەخوارەوە."
بەپێی گوتەی ئەو شایەتحاڵانە، مووشەکەکە نەتەقیوەتەوە، "ئەگە بتەقیبایەتەوە، زیانێکی زۆری بە گوندەکە دەگەیاند."