سەرۆکایەتیی هەرێمی کوردستان بۆ رووداو: بردنەوەی خەڵاتی وێبی شانازییەکی گەورەیە

 

 

لە پەیامێکدا، بەڕێوەبەرایەتیی کاروباری میدیا لە سەرۆکایەتیی هەرێمی کوردستان دەڵێت: "بردنەوەی ئەم خەڵاتە نێودەوڵەتییە کە پێوەری باشترین چیڕۆک و گێڕانەوەی بەرهەمی دیجیتاڵییە، بەتایبەتی لە پێشبڕکێ لەگەڵ بەرهەمی کەناڵە نێودەوڵەتییە بەناوبانگەکانی وەک (CNN) و (BLOOMBERG) شانازییەکی گەورەیە بۆ (رووداو) و دەستکەوتێکی دیکەی گرنگیشە بۆ میدیای کوردی." 

 

لە بەشێكی دیکەی پەیامەکەیدا، سەرۆکایەتیی هەرێمی کوردستان ئاماژە بەوە دەکات: "بەبۆنەی بەدەستهێنانی خەڵاتی جیهانیی (وێبی) بۆ فیلمە بەڵگەنامەییەکەی (کۆرۆوای)، پیرۆزباییەکی گەرم لە بەڕێوەبەری گشتی و تەواوی کارمەندانی دەزگاکەتان بە گشتی و ستافی بەرهەمهێنەری فیلمە بەڵگەنامەییەکە بەتایبەتی، دەکەین." 

 

ئەم ساڵ بەڵگەفیلمی کۆرۆوای-ی تۆڕی میدیایی رووداو لەنێو زیاتر لە 13 هەزار بەشداربوو بووە براوەی خەڵاتی وێبی. 

 

بەڵگەفیلمەکەی تۆڕی میدیایی رووداو سەر بە بەشی گەشت و شێوەی ژیانە( Travel and Lifestyle). لەنێو هەزاران بەڵگەفیلمێکی ئەمریکی، نیوزیلاندی و جۆرجیایی بووە براوەی خەڵاتەکە.

 

بەڵگەفیلمی کۆرۆوای لە دارستانەکانی پاپوای رۆژئاوا لە ئیندۆنیزیا تۆمارکراوە و لەسەر خێڵێکی نێو دارستانەکەیە کە تاوەکو ساڵی حەفتاکانی سەدە رابردوو، نە کەس دەیزانی ئەو خێڵە هەن و نە ئەندامانی خێڵەکەش دەیانزانی جیهانێک لە دەرەوەی دارستانەکەیاندا هەیە. 

 

خەڵاتی وێبی ساڵی 1996 دامەزراوە و ساڵانە لەلایەن ئەکادیمیای نێودەوڵەتی هونەر و زانستە دیجیتاڵییەکان (IADAS) پێشکەش دەکرێت، ئەمساڵ یادی 28 ساڵەی خەڵاتەکەیە. 

 

خەڵاتەکان تایبەتن بە داهێنان و لێهاتوویی تەکنیکی لەسەر پلاتفۆڕمە جیاوازەکان لە تۆڕی ئینتەرنێتدا؛ بەشێوەیەک بە ئۆسکاری ئینتەرنێت ناوی دەهێندرێت. 

 

دوو پرۆسە بۆ دابەشکردنی خەڵاتەکان هەیە، سەرەتا بەربژێرەکان لەلایەن IADAS هەڵدەبژێردرێن و دواتر براوەکان لەڕێگەی ژمارەیەک دادوەری جیهانییەوە دیاری دەکرێن.  هەروەها بەشێکی دیاریکردنی براوەی خەڵاتەکە لە رێگەی دەنگدانی خەڵکەوە دیاری دەکرێت.

 

 

بەڕێز/ تۆڕی میدیایی ڕووداو

 

بەبۆنەی بەدەستهێنانی خەڵاتی جیهانیی (وێبی) بۆ فیلمە بەڵگەنامەییەکەی (کۆرۆوای)، پیرۆزباییەکی گەرم لە بەڕێوەبەری گشتی و تەواوی کارمەندانی دەزگاکەتان بە گشتی و ستافی بەرهەمهێنەری فیلمە بەڵگەنامەییەکە بەتایبەتی، دەکەین.

 

بردنەوەی ئەم خەڵاتە نێودەوڵەتییە کە پێوەری باشترین چیڕۆک و گێڕانەوەی بەرهەمی دیجیتاڵییە، بەتایبەتی لە پێشبڕکێ لەگەڵ بەرهەمی کەناڵە نێودەوڵەتییە بەناوبانگەکانی وەک (CNN) و (BLOOMBERG) شانازییەکی گەورەیە بۆ (رووداو) و دەستکەوتێکی دیکەی گرنگیشە بۆ میدیای کوردی.

 

دووبارە پیرۆزباییتان لێ دەکەین و هیوای سەرکەوتن و پێشکەوتنی زیاترتان بۆ دەخوازین..

 

بەڕێوەبەرایەتیی کاروباری میدیا لە سەرۆکایەتیی هەرێمی کوردستان