پەروەردە و خوێندنی باڵا تاقیکردنەوەکانیان دواخست؛ پۆلی 12 ئاگاداربن

وەزارەتەکە لە راگەیێندراوێکدا ئاماژەی بەوە کردووە، هەموو تاقیکردنەوەکان لە قوتابخانە حکومی و ناحکومییەکان بە قوتابخانە ناحکومییە نێودەوڵەتییەکان و تاقیکردنەوەکانی وەزاری پۆلی 12ـی ئامادەیی بە هەموو بەشەکانیەوە، هەروەها تاقیکردنەوەکانی خولی دووەمی قوتابخانە حکومی و ناحکومییەکانیش هەمووی دوادەخرێت بۆ هەفتەی داهاتوو. 

 

ئەم راگەیێندراوەی وەزارەتی پەروەردە لەکاتێکدا، بەرەبەیانی ئەمڕۆ ئیسرائیل هێرشێکی فراوانی کردە سەر ئێران و تارانیش هەر ئەمشەو، بە چەندین مووشەکی بالیستی وەڵامی دایەوە و وەزارەتی پەروەردە دەڵێت، لەبەر بەرژەوەندیی گشتی بڕیارەکەیان داوە. 

 

لەگەڵ وەزارەتی پەروەردە هەر یەکە لە وەزارەتەکانی خوێندنی باڵا و ئەوقاف کاردانەوەیان بۆ بڕیارەکە راگەیاند. ئەوقاف رەتیدەکاتەوە تاقیکردنەوەکان دوابخات.

 

لە راگەیێندراوی وەزارەتی ئەوقافدا هاتووە، "سەبارەت بە گشت تاقیکردنەوەکانی گشتی پۆلی (12) خولی یەکەم و تاقیکردنەوەی  نیشتمانیی پۆلی(9) خولی دووەم و و پۆلەناکۆتاکان خولی دووەم لەسەر خشتەی دیاری کراو بەڕێوەدەچێت و دواناخرێت. واتا هەموو تاقیکردنەوەکان لە کات و بەپێی خشتەی دیاریکراوی خۆی بەڕێوەدەچێت.

 

خوێندنی باڵاش دەڵێت، لەسەر فەرمانی بەڕێز د. ئارام محەممەد قادر، وەزیری خوێندنی باڵا و توێژینەوەی زانستی، بەهۆی ناجێگیریی بارودۆخی ئاسایشی ناوچەکە و هەرێمی کوردستان، بڕیاردرا بە دواخستنی (پرۆسەی خوێندن و تاقیکردنەوەکانی خولی دووەم) لە سەرجەم زانکۆکان و ناوەندەکانی خوێندنی سەر بە وەزارەتەکەمان و دامودەزگەکانی ديكە بۆ ماوەی یەک هەفتە.