خۆپێشاندانی رۆژئاوای کوردستان بۆ زمانی کوردی بەردەوامە؛ "زمانی دایکمان لە کەس نەدزیوە"

 

مەیۆفا مەحموود، ژنێکی کوردە و تەمەنی 70 ساڵە، سەرەڕای تەمەنەکەی لە ماڵەوە دانەنیشتووە و چووەتە نێو خۆپێشاندەران. ئەو دەڵێت، کاتێک بیستوویەتی لە دەرەوە قەرەباڵخییە و پێیان گوتووە رۆژی زمانی کوردییە، هەر بەپەلە دەرمانە ئازارشکێنەکەی خواردووە و خێرا چووەتە دەرەوە.

 

مەیۆفا مەحموود دەڵێت: "من ئێستا بۆ زمانی خۆم هاتوومەتە دەرەوە، بۆ زمانی کوردی. ئێمە تا ڕۆژێک لە تەمەنماندا مابێت، واز لە زمانی کوردی ناهێنین. ئێمە شوێن زمانی خۆمان دەکەوین؛ منداڵەکانمان بە کوردی دەخوێنن و ئێمەش پشتیوانییان دەکەین. جلوبەرگی من کوردین و تا مابم هەر کورد دەبم. ئێمە ڕێچکەی کوردایەتی بەرنادەین؛ من کوردم، ئەی دەبێت بە چ زمانێک بدوێم؟ بێگومان هەر بە کوردی قسان دەکەم."

 

لەو چالاکییانەدا خەڵکی رۆژئاوای کوردستان هاوڕان لەسەر ئەوەی کە پێویستە مافی خوێندن بە زمانی دایک پارێزراو بێت و رێگری لە خوێندنی کوردی نەکرێت.

 

دیلان عەلی، خوێندکاری زمانی کوردی دەڵێت: "ئەم زمانە دیارییەکە خودا بۆی ناردووین، لە کەسمان نەدزیوە. ئێمە دەچینە قوتابخانەکانمان و بە زمانی دایکمان دەخوێنین."

 

خەڵکی ناوچەکە سوورن لەسەر داواکارییەکانیان و بۆ پشتیوانیکردن لە فەرمیکردنی زمانی کوردی هاتوونەتە دەنگ و جەخت لە ناسنامەی نەتەوەیی خۆیان دەکەنەوە.