لە رێگەی هەولێر - گەزنە شەش میکسەر سووتان

 

 

ئاگرەکە لە کارگەیەکی کۆنکرێت کەوتەوە، لە بەگوێرەی ئەو ڤیدیۆیانەی پێشتر بۆ تۆڕی میدیایی رووداو نێردراون، ژمارەیەک بارهەڵگری میکسەر لەو شوێنە راگیراون و دووکەڵێکی رەش لە شوێنەکە بەرزدەبوویەوە. 

 

بەختیار قادر، پەیامنێری رووداو لە شوێنی ئاگرکەوتنەوەکە گوتی کە بەرگریی شارستانی ئاگرەکەی کۆنترۆڵ کردووە. 

 

بەگوێرەی زانیارییە سەرەتاییەکانی بەرگریی شارستانی و شایەتحاڵان، ئاگرەکە لە پووش و پەڵاش بەربووە و دواتر بەرەو نێو کارگەکە تەشەنەی سەندووە. 

دواتر ئاگرەکە گەیشتووەتە تانکەری گازی یەکێک لە میکسەرەکان و سووتاوە. لەگەڵ ئەوەدا، ئاگرەکە بۆ میکسەرەکانی دیکەش تەشەنەی سەندووە و پێنج میکسەری دیکە کە بە تەنیشت یەکەوە راگیرابوون سووتاون. 

 

پەیامنێری رووداو دەڵێت، چوار لەو میکسەرانە بەتەواوی سووتاون. 

 

لە ماوەی نزیکەی 24 کاژێری رابردوودا، ئەمە پێنجەم رووداوی ئاگرکەوتنەوەیە لە سنووری هەولێر روودەدات.