جەژنی خدر ئەلیاسی کوردی ئێزدی بەڕێوەدەچێت
رووداو - باعەدرێ
رێوڕەسمەکانی تایبەت بە جەژنی خدر ئەلیاسی کوردانی ئێزدی دوێنی دەستیانپێکرد و تاوەکو سبەیش بەردەوام دەبن.
دووەم رۆژی جەژنەکە کە ئەمڕۆ بەڕێوەدەچێت بە "جەژنی نەبی" ناوزەدکراوە. کوردانی ئێزدی گرنگییەکی زۆر بە جەژنی خدر ئەلیاس دەدەن و پێیانوایە لەو مانگەدا دەرگای خێر و بەرەکەت بەسەر خەڵکدا دەکرێتەوە، ئەو کوڕ و کچانەش کە دەیانەوێ ژیانی هاوبەش پێکبێنن، بە ئارەزووی دڵیان دەگەن.
یەکێک لە رێوڕەسمەکانی ئەو جەژنە ئەوەیە؛ گەنم و جۆ سووردەکرێنەوە و پێیان دەگوترێت قەلاندۆک. هۆشیار یەزدین، پیاوێکی ئایینی کوردانی ئێزدییە و باس لەوە دەکات "نابێت لەم جەژنەدا هیچ ئاژەڵێکی وەکو چێڵ، بزن یان مەڕ سەری ببڕێت، چونکە گوناحە".
لە رۆژی جەژنی خدر ئەلیاسدا، ژمارەیەکی زۆری کوردانی ئێزدی دەچنە مەزار و پەرستگەکانی نزیک شوێنی نیشتەجێبوونیان و نزادەکەن، هەروەها بەپێی بیرەوباوەڕی ئێزدییەکان، هەرکەسێک ناوی خدر یان ئەلیاس بێت، دەبێت لەماوەی ساڵێکدا سێ رۆژی لەسەر یەک بەڕۆژوو بێت.
داڕشتنەوە: هەڵات رێبوار