سەهەند لە یادی لەدایکبوونیدا بە رووداوی هاتووچۆ گیانی لەدەستدا
رووداو - هەولێر
لە شەقڵاوە منداڵێکی تەمەن حەوت ساڵان لە یادی لەدایکبوونیدا ئۆتۆمبێل لێیدەدات و گیانی لەدەستدا.
دوای هەفتەیەک مانەوەی لە نەخۆشخانە، لە رۆژی چوارشەممە 14-3-2018، کە دەکاتە یادی لەدایکبوونی، سەهەند لە نەخۆشخانە گیانی لەدەستدا.
بەگوتەی کاروان زرار شۆفێری ئۆتۆمبێلەکە دەستگیرکراوە. ئەو دەڵێت "رووداوەکە قەزاوقەدەرە و هیچی لەگەڵ ناگوترێت".
سەهەند ئەمیر کەمال لە رۆژی 14-3-2011 لەدایکبووە، لە 14-3-2018 و لە تەمەنی حەوت ساڵیدا گیانی لەدەستدا.
ئەوە یەکەم خەمی ئەو خێزانە نییە، لە ساڵی 2015ـش دایکی سەهەند لەکاتی نووستندا کۆچی دوایی کردووە.
سەهەند منداڵی ناوەنجی خێزانەکەی بوو. دوو برای دیکەشی هەیە.