بوومەلەرزەیەک لە چەولیگی باکووری کوردستان روویدا

 

سەرۆکایەتیی کارەساتی لەناکاو و فریاگوزاریی تورکیا (ئافاد) بڵاویکردەوە، کاژێر 02:14 خولەکی بەرەبەیانی ئەمڕۆ یەکشەممە 16ـی شوباتی 2025، بوومەلەرزەیەک بە گوڕی 4.8 پلەی رێختەر لە پارێزگای چەولیگ روویداوە و شارۆچکەی چێرمە چەقی بوومەلەرزەکە بووە.

 

بەگوێرەی ئافاد، بوومەلەرزەکە لە قووڵایی 12.79کیلۆمەتر تۆمارکراوە. 

 

پارێزگای چەولیگ لە راگەیێندراوێكدا رایگەیاند، لە لێکۆڵینەوە سەرەتاییەکاندا دەرکەوتووە بوومەلەرزەکە هیچ زیانێکی گیانی و ماددی نەبووە. 

 

لە شەشی شوباتی 2023، دوو بوومەلەرزە بە گوڕی 7.7 و 7.6 پلەی رێختەر لە پارێزگای مەڕەشی باکووری کوردستان روویاندا. بوومەلەرزەکان 10 پارێزگای تورکیا و باکووری کوردستانیان هەژاند.

 

بەگوێرەی ئامارە فەرمییەکان، 53 هەزار و 500 کەس لە باکووری کوردستان و تورکیا لە ئەنجامی ئەو بوومەلەرزانە گیانیان لەدەستدا و 107 هەزار و 204 کەسی دیکە بریندار بوون.