لێپرسراوی پڕۆژەی دارستانی ئەزمڕ: بە بەتانی تەڕ ئاگر دەکوژێنینەوە

 

رزگار ساڵح، لێپرسراوی پڕۆژەی دارستانی ئەزمڕ، بە تۆڕی میدیایی رووداوی راگەیاند :"ئێمە دوو ئامێری بلدۆزەرمان هەیە. بۆ دروستکردنی ئاگربڕ لە سنووری سلێمانی، ئەو شوێنانەی گونجاو بن، بە دەرمانڕشتن ئاگربڕیان بۆ دروست دەکرێ و ناوچەکانی دیکەش بە بلدۆزەر ئاگربڕیان بۆ دروست دەکەین. لە رۆژی 10ـی ئایارەوە پرۆسەکە دەستیپێکردووە و تاوەکو 25ـی ئەم مانگە بەردەوام دەبێت".

 

لێپرسراوی پڕۆژەی دارستانی ئەزمڕ باسی لەوە کرد، لە سنووری ئەزمڕ و گۆیژە نزیکەی 120 دۆنم زەوی ئاگربڕ دەکرێ؛ ئاماژەی بەوەشکرد، ساڵی رابردوو بەهۆی کەمی بارانبارین و وشکەساڵییەوە ئاگرکەوتنەوە لە ئەزمڕ و گۆیژە نەبوو، بەڵام ئەم ساڵ بارانی زۆر باری و ئەگەر ئەم ساڵ ئاگر بکەوێتەوە، زیانێکی زۆر بە دارستان و پاوانی سنوورەکە دەکەوێ.

 

لە ساڵانی 2019 و 2022 دوو ئاگرکەوتنەوەی گەورە لە گۆیژە و ئەزمڕ روویاندا و سەتان دۆنم زەوی سووتان. لەبارەی شێوازی کۆنترۆڵکردنی هەر ئاگرێک کە بکەوێتەوە، رزگار ساڵح دەڵێت "کارمەندەکانمان بەشێوازێکی سەرەتایی ئاگر دەکوژێننەوە. ئەگەر ئاگر بکەوێتەوە، کارمەندەکانمان بەتانی تەڕ دەکەن و هەوڵی کوژدانەوەی ئاگرەکە دەدەن، چونکە تەنیا یەک ئامێری (فلاوەری ئاگر کوژێنەوەمان) هەیە. ئەگەر لە شوێنێکی دوورە دەست ئاگر بکەوێتەوە، تاوەکو ئامێرەکە دەگوازینەوە و دەگەینە شوێنی رووداوەکە، بەشێکی زۆری پووش و دارستانەکە دەسووتێ، جگە لەوەش هیچ جلوبەرگێکی تایبەت بە ئاگرکوژاندنەوەمان نییە".

 

 

بەگوتەی لێپرسراوی پڕۆژەی دارستانی ئەزمڕ، تەنیا کارمەندیان هەیە و هیچ کرێکارێکیان نییە. رزگار ساڵح دەڵێت: "ئەگەر ئاگر بکەوێتەوە، دەبێت لایەنە پەیوەندیدارەکان وەک بەرگریی شارستانی ئاگادار بکەینەوە بێن بە هانامانەوە، ئەوانیش کاتێکی زۆریان پێدەچێت بگەنە سەر چیاکە. لەو ماوەیەشدا ئاگرەکە تەشەنە دەکات، بەڵام ئەگەر کرێکار و کارمەندمان هەبێت و لێرەبن، زوو دەتوانین ئاگرەکە کۆنترۆڵ بکەین".

 

رزگار ساڵح ئاماژە بەوە دەکات: "ئێمە ساڵانە لە مانگی پێنجەوە داوای دامەزراندنی کرێکار دەکەین. ساڵی رابردوو هیچ کرێکارێکمان بۆ دانەمەزرا. بەهۆی ئەوەی ئاگر نەکەوتەوە و وشکەساڵی بوو، پووش و پاوان کەم بوو و توانیمان ساڵەکە تێپەڕێنین، بەڵام ئەم ساڵ پووش و پاوانێکی زۆر هەیە، بۆیە مەترسی هەیە ئاگرکەوتنەوە زیانی زیاتری هەبێت، بۆیە داوا لە حکومەت دەکەین بەزوویی کرێکارمان بە گرێبەست بۆ دابمەزرێنێت.

 

 

جگە لە ئاگر، پیسبوونی ژینگەش زیانی زۆر بە ناوچەکە دەگەیێنێت. رزگار ساڵح دەڵێ: "بەشێکی گەشتیاران، کە سەردانی ئەزمڕ و گۆیژە دەکەن، شووشە فڕێ دەدەن و ژینگەی ناوچەکە پیس دەکەن.جگە لەوەش ئاگر دەکەنەوە و پاشماوەی ئاگرەکەیان مەترسی دروست دەکات. هەموو رۆژێکیش تیمەکانی شارەوانی دێنە سەر چیا و پاشماوەکان لادەبەن، بەڵام پاشماوەکان زۆرن و شووشە بۆ زیاتر لە 15 ساڵ لە سرووشتدا دەمێنێتەوە و زیانی زۆری هەیە".

 

باسی لەوەشکرد کە "تیمەکانمان رۆژانی هەینی، کیسی خۆڵ بەسەر گەشتیاراندا دابەش دەکەن، بەڵام بەشێک شۆفێرەکان کیسی خۆڵەکان دەخەنە ئۆتۆمبێلەکانیانەوە و بەکاری ناهێنن بۆ کۆکردنەوەی پاشماوەکان".