قایمقامی هەولێر: لیژنەکانمان راسپاردووە بۆ کۆنترۆڵکردنی نرخەکان لە بازاڕ

 

ئەمرۆ سێشەممە 17-1-2023، نەبەز عەبدولحەمید، قایمقامی هەولێر بە رووداوی راگەیاند: "دابەزینی بەهای دینار بەرامبەر دۆلار کاریگەریی راستەوخۆی لەسەر بازاڕەکانی هەرێمی کوردستان دروستکردووە، نرخی شتومەک بە شێوەیەکی سنووردار گۆڕانی بەسەر هاتووە، ئەوەش تا رادەیەک ئاساییە، چونکە کاسبکارانیش کاڵا و شتومەکەکانیان گرانتر لە پێشووتر دەگاتە دەست، بەڵام نابێت بگاتە رادەی قۆستنەوە." 

 

نەبەز عەبدولحەمید گوتی، لیژنەکانیان ئاگادارکراونەتەوە کە بەردەوام چاودێربن بەسەر کاسبکار و بازرگانەکانەوە بۆ ئەوەی دۆخەکە نەقۆزرێتەوە. 

 

هاوکات شەهاب ئەحمەد، قایمقامی کەلار رایگەیاند: بەرزبوونەوەی دۆلار بەرامبەر دینار بارودۆخەکەی ناجێگیرکردووە. راستەوخۆ کاریگەریی لەسەر نرخی کاڵا و شتومەک هەیە، بۆیە سبەی لەگەڵ بەڕێوەبەرایەتیی چاودێریی بازرگانیی گەرمیان و سەرۆکی لیژنە هاوبەشەکانی گەرمیان کۆدەبینەوە بۆ گەشتن بە چارەسەرێک لە کۆنترۆڵکردنی بازاڕ بۆ ئەوەی بەشێک لە بازرگان و فرۆشیاران دۆخەکە نەقۆزنەوە. 

 

رۆژی سێشەممە 17-01-2023، نەوزاد شێخ کامیل، بەڕێوەبەری گشتیی بازرگانیی هەرێمی کوردستان لە وەزارەتی بازرگانی و پیشەشازی بە رووداوی راگەیاند، "دڵنیایی دەدەینە هاووڵاتییان بەوەی کاڵایەکی خۆراکی زۆر لە هەرێمی کوردستاندا هەیە." 

 

وەک نەوزاد شێخ کامیل دەڵێت: "بەشەخۆراکی دوو مانگی هاووڵاتییان لەلایەن وەزارەتی بازرگانیی عێراقەوە رەوانەکراوە و لەم چەند رۆژەی داهاتوودا بەشەخۆراکی یەکەم مانگی ئەمساڵ بەسەر هاووڵاتییاندا دابەشدەکەین، بۆیە مەترسییەکی ئەوتۆ لە بەرزبوونەوەی نرخی خۆراکە سەرەکییەکان نییە."