ئەو منداڵەی لە دهۆک پێویستی بە چاندنی دڵە: لەم عەزابە دەرمبهێنن
رووداو دیجیتاڵ
ئیناس، کچێکی تەمەن 11 ساڵانە و خەڵکی دهۆکە؛ بەهۆی فراوانبوونی ماسوولکەکانی دڵیەوە، ژیانی لە مەترسیدایە. پزیشکەکەی دەڵێت، مانەوەی لە ژیاندا "پەرجووە" و تاکە چارەسەری، چاندنی دڵە.
دایکی ئیناس، بە گریانەوە داوای هاوکاری دەکات و دەڵێت، "کچەکەم لە تەمەنی 8 مانگییەوە نەخۆشە. بڕیاربوو ئەم ساڵ بچێتە قوتابخانە، جل و پێداویستیم بۆ کڕی، بەڵام نەیتوانی بچێت. ماوەی 4 مانگە لە نەخۆشخانەیە".
نەخۆشییەکە ئیناسی لە هاوڕێ و قوتابخانە دابڕیوە. ئەو دەڵێت، "ئازارم زۆرە، شەو تا بەیانی خەوم نییە و زۆر پێویستیم بە هاوکارییە".
ئیناس بە هەنسکەوە داوایەک لە خێرخوازان و بەرپرسان دەکات و دەڵێت، "لەم عەزابە دەرمبهێنن".