پارێزگاری بانکی ناوەندیی عێراق کردنەوەی لقی بانکەکەیان لە سلێمانی رادەگەیێنێت

 

ئەمڕۆ ناوەندی نێودەوڵەتی بۆ دارایی و بازرگانی لە سلێمانی دەکرێتەوە. 

 

شاد فیکرەت، بەڕێوەبەری پەیوەندییەکانی ناوەندی نێودەوڵەتی بۆ دارایی و بازرگانی ئەمڕۆ 20-02-2025 میوانی بووڵتەنی ئابووریی تۆڕی میدیای رووداو بوو و رایگەیاند، بۆ یەکەمجار لە مێژووی عێراقدا ناوەندی نێودەوڵەتیی دارایی و ئابووری لە عێراق دەکرێتەوە.

 

کردنەوەی ئەم ناوەندە رێخۆشکەر دەبێت بۆ کردنەوەی لقی بانکەکانی دیکە لە پارێزگاکەدا. بەڕێوەبەری پەیوەندییەکانی ناوەندەکە دەڵێت، پارێزگاری بانکی ناوەندیی عێراق لە مەراسیمەکە کردنەوەی لقی بانکی ناوەندیی عێراق لە سلێمانی رادەگەیەنێت.

 

شاد فیکرەت گوتی، "بۆ کردنەوەی لقەکانیان بانکەکانی رەشید و رافیدەین لیژنەیان ناردووەتە سلێمانی و رێکارەکانی کردنەوەیان لە قۆناخی کۆتاییدایە، بەڵام ئەمڕۆ کردنەوەی لقەکانیان راناگەیێنن".

 

لە بارەی ئەو بانکانەی کە لقیان لە ناوەندی نێودەڵەتی بۆ دارایی و بازرگانی دەکەنەوە شاد فیکرەت گوتی، چەندین بانکی نێوخۆی و جیهانی لە ناوەندەکە لقیان دەبێت، لەگەڵ چەندین کۆمپانیای پشکداری، کۆمپانیای ئاڵوگۆڕی دراو و لقی بازاڕی کاخەزە داراییەکانی عێراق".