کۆسرەت رەسووڵ: کەرکووک سەری کوردستانە

 

رۆژی دووشەممە 20-3-2023، کۆسرەت رەسووڵ عەلی، سەرۆکی ئەنجوومەنی باڵای سیاسی و بەرژەوەندییەکانی یەکێتیی نیشتمانیی کوردستان بەبۆنەی نەورۆز و سەری ساڵی نوێی 2723 و رزگارکردنی شاری کەرکووک لە 21ـی ئاداری ساڵی 1991، پەیامێکی بڵاوکردەوە و تێیدا داوا لە هێز و لایەنە سیاسییەکان دەکات هەنگاو بۆ چارەسەرکردنی کێشەکان بنێن.

 

کۆسرەت رەسووڵ،  جیا لە هەردوو درووشمی "کەرکووک دڵی کوردستانە" کە مستەفا بارزانی، دامەزرێنەری پارتی دیموکراتی کوردستان و "کەرکووک دڵی کوردستانە"ـی جەلال تاڵەبانی، سکرتێری کۆچکردووی یەکێتیی نیشتمانیی کوردستان، ناوێکی نوێ بۆ جەختکردنەوە لە کوردستانیبوونی کەرکووک دادەهێنێت و دەڵێت: "کەرکووک سەری کوردستانە." 

 

 

بەبۆنەی هاتنەوەی سەری ساڵی تازەی کوردی و جەژنی نەورۆز و رزگارکردنی کەرکووک پیرۆزبایی گەرمی خۆم ئاراستەی کۆمەڵانی خەڵکی کوردستان، پێشمەرگە قارەمانەکان و کەسوکاری سەربەرزی شەهیدان دەکەم.

 

دوای 32 ساڵ ئەوپەڕی شانازیمە و یەکێک لە رۆژە خۆشەکانی ژیانمان بوو کە لەگەڵ هەڤاڵان بەشداری راستەقینە بووین لە رزگارکردنی کەرکووک و وەدەرنانی رژێمی بەعس لە شارەکە، ئەو رۆژە هەموومان پێکەوە کوردستانیەتی کەرکووکمان دووپات کردەوە و بە دڕندەترین رژێمی دونیامان گوت کەرکووک کوردستانییە، هیچ هێزێک ناتوانێ ناسنامەی شارەکە بگۆڕێت و کەرکووک (سەر)ی کوردستانە و شاری پێکەوەژیان و برایەتییە.

 

ئەمڕۆ کە 32 ساڵ تێپەڕ دەبێت بەسەر راپەڕین و رزگارکردنی شاری کەرکووک، هاوکات جەژنی نەورۆز و سەری ساڵی تازەی کوردییە، داوا لە سەرجەم هێزو لایەنە سیاسییەکان دەکەم هەنگاو بنێن بە ئاراستەی چارەسەری کێشەکان، بۆ گەیشتن بە ئاوات و ئامانجە لەمێژینەکانمان، ئەو ئاواتەی ساڵەهایە خەباتی بۆ دەکەین و هێشتا پێی نەگەیشتووین.

 

دووبارە ئەم یادە پیرۆزەتان لێ پیرۆز دەکەم، درود و سڵاو دەنێرین بۆ گیانی شەهیدانی رزگارکردنی کەرکووک و سەرجەم شەهیدانی کوردستان.

 

کۆسرەت رەسووڵ عەلی، سەرۆکی ئەنجومەنی باڵای سیاسی و بەرژەوەندی یەکێتیی نیشتمانیی کوردستان