خێزانی ئەو گەنجەی لە زیندانێکی سلێمانی گیانی سپارد، سکاڵا تۆمار دەکەن

 

 

 

داریووش، ئەو گەنجەی کە بەپێی ماددەی 446ی یاسای سزادان بۆ ماوەی 10 رۆژ راگیرابوو، شەوی 17ی ئایار تەرمەکەی لەنێو گەرماوی چاکسازییەکەدا بە خنکاوی دۆزرایەوە.

 

 

بەپێی زانیارییەکانی رووداو کە لە سەرچاوەیەکی ئاگادارەوە دەستی کەوتوون، لە تۆماری کامێراکانی چاودێرییەوە دەرکەوتووە، داریووش کاژێر 03:05ی بەیانی لەگەڵ هاوڕێکانی قسەی کردووە. دواتر لە کاژێر 03:19 خولەکدا پەتێکی لەژێر جێگەکەی دەرهێناوە و چووەتە گەرماوەکە. پاش ئەوەی دووجار بۆ بردنی خاولی گەڕاوەتەوە، چووەتەوە نێو گەرماوەکە و خۆی خنکاندووە.

 

شۆڕش کەمال، خاڵی داریووش بە رووداوی راگەیاند: "سەیری کامێرای چاودێریمان کردووە، کاژێر 03:15ی شەو چووەتە گەرماوەکە و تاوەکو 21 خولەک لەوێ ماوەتەوە، بەڵام لەو ماوە زۆرەدا کەس لێی نەپرسیوە."

 

خاڵی داریووش ئەو دەنگۆیانەشی رەتکردەوە کە گوایە داریووش تەشتی لەبەردەم کامێراکە دانابێت تاوەکو نەبینرێت و گوتی: "سەری لە کامێراکەدا دەرچووە و بە تەواوی دیارە."

 

خێزانی داریووش بە فەرمی سکاڵایان لەسەر بەرپرسی کامێراکانی چاودێریی چاکسازییەکە تۆمار کردووە. ئەوان دەپرسن: "بۆچی رێگەی پێدراوە کاژێر 3ی شەو بچێتە گەرماو؟ و چۆن لەو ماوە زۆرەدا کەس لە رێگەی کامێراکانەوە نەیبینیوە و رێگری لێ نەکردووە؟"

 

لەلایەکی دیکەوە، دەستەی سەربەخۆی مافی مرۆڤ لە هەرێمی کوردستان رایگەیاند کە ئەندامن لە لیژنەی لێکۆڵینەوە لە کەیسەکە و سەردانی چاکسازییەکەیان کردووە.

 

دەستەکە ئاماژەی بەوە کردووە، بەوردی چاودێریی تۆمارە ڤیدیۆییەکانیان کردووە و ئێستا چاوەڕێی ئەنجامی کۆتایی لێکۆڵینەوەکانی دادگەن بۆ ئەوەی بزانرێت ئایا کەمتەرخەمیی کارگێڕی هەبووە یان نا.