ماڵپەڕی نوێی سەرۆکایەتیی هەرێمی کوردستان دەکەوێتەوە کار

 

لە رێوڕەسمێکدا بە ئامادەبوونی ژمارەیەک لە بەرپرسان، میدیاکاران و نووسەران، رۆژی پێنجشەممە، 19-10-2023، لە بارەگای سەرۆکایەتیی هەرێمی کوردستان، ماڵپەڕی نوێی سەرۆکایەتیی هەرێمی کوردستان خرایەڕوو کە بڕیارە بەمنزیکانە بکەوێتەکار. 

 

رۆژی هەینی، 20-10-2023، جەواد قادر، بەڕێوەبەری پڕۆژەی ماڵپەڕی دیجیتاڵیی سەرۆکایەتیی هەرێمی کوردستان بە تۆڕی میدیایی رووداوی راگەیاند، "لە ماڵپەڕی نوێدا كۆمەڵێك گۆڕانكاری لە شێواز، تەكنیك و نێوەڕۆكی بەش و بابەتەكانی نێو ماڵپەڕەكە دەکرێن. ماڵپەڕی سەرۆکایەتیی هەرێمی کوردستان پێگەیەکی دیجیتاڵی فەرمییە بۆ گەیاندنی ئەو پەیام و زانیارییانەی کە گوزارشت لە روانگەی سەرۆکایەتیی هەرێمی کوردستان دەکەن لەبارەی کۆی ئەو پرسانەی کە پەیوەندییان بە هاووڵاتی و فەرمانڕەواییەوە هەیە".

 

جەواد قادر گوتی، "ئەم ماڵپەڕە دوو جۆر زانیاری لەخۆدەگرێت. یەکەمیان، زانیاریی جێگیرە کە دەمێنێتەوە و هەموو کاتێک بۆ سەردانیکار لەبەردەست دەبێت. جۆری دووەمی زانیارییەکە زیاتر فۆرمی هەواڵی هەیە و پەیوەستە بە رووداوەکانی رۆژ، وەکو دیدار، گوتار، پەیام و لێدوانەکان".

 

بەڕێوەبەری پڕۆژەی ماڵپەڕی دیجیتاڵیی سەرۆکایەتیی هەرێمی کوردستان گوتیشی، "لە ماڵپەڕە نوێیەکەدا بەشی یاسا، بەڵگەنامە و دۆكیومێنتە سەرەكییەكان بەردەست دەبێت بۆ هەر توێژەر و سەردانیكەرێك ئەو زانیارییانەی بوێت. بەشی تایبەتیش بەردەستن بۆ وێنە هەواڵ، ڤیدیۆ و بابەتی دیكەی لەو جۆرە".

 

جەواد قادر باسی زیادکردنی ئەو زمانانەشی کرد کە لە داهاتوودا لە ماڵپەڕی سەرۆکایەتیی هەرێمی کوردستان دەبن و گوتی، "‎لە قۆناخەكانی داهاتووی ئەو پڕۆژەیەدا ئامانجمانە کە لەپاڵ ئەو زمان و زاراوانەی ئێستا لە ماڵپەڕەکەدا هەن (كوردی، عەرەبی، ئینگلیزی)، زمانی پێكهاتەكانی دیكەی کوردستان، لەوانە تورکمانی و سریانی زیاد بکەین. هەروەها هەوڵمان ئەوە دەبێت پەیام و زانیارییەکان بە دوو زمانی دیکەی گەورەی ناوچەکە کە تورکی و فارسین بگەیێنین. هەوڵ دەدەین ئەم ماڵپەڕە هاوشێوەی دامەزراوەی سەرۆکایەتیی هەرێمی كوردستان، چەترئاسا، كۆكەرەوە و فرە رەنگ بێت."

 

رۆژی 10-6-2019 لە رێوڕەسمێکی گەورە و بە ئامادەبوونی سەدان میوانی کوردستانی، عێراقی و جیهانی، نێچیرڤان بارزانی، سەرۆکی هەرێمی کوردستان سوێندی یاسایی خوارد و وەکو سەرۆکی هەرێمی کوردستان دەستبەکاربوو. نێچیرڤان بارزانی دوو جێگری هەیە کە ئەوانیش جەعفەر شێخ مستەفا لە پشکی یەکێتی و مستەفا سەید قادر لە پشکی گۆڕان.