رووداو ڤیدیۆی چرکەساتی هێرشە مووشەکییەکەی ئێران بۆ سەر هەولێر بڵاودەکاتەوە

 

بەگوێرەی ئەو گرتە ڤیدیۆیەی کە بۆ تۆڕی میدیایی رووداو نێردراوە، دەردەکەوێت لە ماوەی کەمتر لە دوو خولەکدا چوار مووشەک بەر ماڵی پێشڕەو دزەیی دەکەون. 

 

 

کاژێر 11:30ـی شەوی دووشەممە 15-01-2024 سوپای پاسدارانی ئێران بە 11 مووشەک هێرشی کردە سەر شاری هەولێر، پێنج لەو مووشەکانە بە ماڵی سەرمایەداری کورد پێشڕەو دزەیی کەوتن. بۆردوومانەکەی ئێران گیانلەدەستدانی پێشڕەو دزەیی و منداڵێکی و هاوڕێیەکی و کارگوزارێکی ماڵەکەی لێکەوتەوە، هەروەها 16 کەسیش بەهۆیەوە بریندار بوون.

 

ئێران لە پاساوی هێرشەکەدا دەڵێت، "ئێمە، بارەگای مۆسادمان لە شوێنێکی هەرێمی کوردستان بە وردی کردە ئامانج، ئەوەش بە واتای بەئامانجگرتنی عێراق نییە، بەڵکو ئیسرائیل دوژمنی هاوبەشی عێراق و ئێرانە.

 

ئەوە لەکاتێکدایە بەرپرسانی حکومەتی هەرێمی کوردستان و عێراق سەرکۆنەی هێرشە دەکەن و رەتی دەکەنەوە هیچ بارەگایەکی مۆسادی ئیسرائیل لە هەولێر بێت و جەخت دەکەنەوە لەوەی ئەو شوێنەی بۆردوومان کراوە، ماڵی هاونیشتمانییەکی سڤیل بووە.