رێگەی دەیان گوندی لوڕستان کرایەوە و بەفر رێگەی سنە بۆ دیواندەرەی داخست

 

محەممەد نازری، قایمقامی شاری مەعموولان لە پارێزگای لوڕستان، بەیانی ئەمڕۆ (سێشەممە، 21-11-2023) گوتی: رێگەی هاتووچۆی 38 گوندی ناوچەی چوڵهوڵ، سەر بە شاری مەعمولان کراوەتەوە و 7 ئۆتۆمبێلیش کە لە لافاودا گیریان خواردبوو، سەرنشینەکانیان رزگارکراون.

 

مەهدی پازووکی، بەڕێوەبەری کۆنترۆڵی قەیرانی پارێزگای لوڕستان، ئێوارەی رۆژی 20-11-2023 گوتی: بەهۆی بارانی بەلێزمە، لافاو هەستاوە و دوو پرد لە ناوچەی پۆلدوختەر ئاو بردوونی، ئەو دوو پردە لە کاتی لافاوەکەی ساڵی 2019 بەشێوەی کاتی دروست کرابوونەوە. 

 

بەهۆی لافاو و ئاوبردنی ئەو دوو پردەوە، رێگەی هاتووچۆی 43 گوند داخراون. شەپۆلی باران ئەمڕۆش لە پارێزگای لوڕستان بەردەوام دەبێت.

 

شەپۆلی باران، پارێزگەکانی سنە و ورمێشی گرتووەتەوە و لە ناوچە شاخاوییەکانی ئەم دوو پارێزگایە بەفر باریوە. بەپێی زانیارییەکان رێگەی هاتووچۆی نێوان شارەکانی دیواندەرە و سنە داخراوە و دەیان ئۆتۆمبێل لەنێو بەفردا گیریان خواردووە.

 

ئەمڕۆ رێگەی هاتووچۆی نێوان سەقز بۆ دیواندەرەش بەهۆی بەفر و باهۆزە ئاستەنگی بۆ دروستبووە.

 

بەهەمان شێوە بەهۆی بارینی بەفرەوە، رۆژی دووشەممە رێگەی گەردەنەی تەتە لەنێوان شارەکانی مەریوان بۆ پاوە داخرا.