بەڵام گەرەنتی نا
دوا راگەیاندنی ئیدارەی ئەمریكا سەبارەت بە مەسەلەی ریفراندۆمی سەربەخۆیی كوردستان، چەند ئاماژەیەكی جێ سەرنجی تیایە، لەوانە ئاماژە بەوەئەدا كە لە خودی راگەیاندنی ریفراندۆمدا هێندێ دەسكەوتی بۆ گەلی كوردستان لێكەوتۆتەوە، كەوتەبێژەكەی وەزارەتی دەرەوەی ئەمریكا ئەڵێ ئەبێ ( كوردەكان شانازی بەوەوە بكەن كە پرۆسەی ریفراندۆم چی بەرهەمهێناوە)، بەڵام ئەوەی ئەو ئاماژەی پێ ئەدا هیچی پەیوەست نییە بە ئایندەی سەربەخۆییەوە، هاوكات هەڕەشەی ناڕاستەوخۆشی تیایە، كە وتەبێژی وەزارەتەكە لە وەڵامی تویتێكی نامۆ عەبدوڵڵای پەیامنێری رووداودا مەترسی سەرلەنوێ هێرشكردنەوەی داعش بۆسەر خاك و خەڵكی كوردستان نیشان ئەدا.
وەك چۆن ئاماژە بەوەش ئەدا كە لە پێداگری كوردستان لەسەر ریفراندۆم دەرفەتی دانوستاندن لەگەڵ بەغدا كەم ئەبێتەوە و ئاسانكارییە جیهانییەكان بۆ ئەو دانوستاندنانە دائەخرێن.
نكوڵی لەوە ناكرێ كە هێنانە رۆژەڤی ریفراندۆمی سەربەخۆیی، هێندێ دەرفەتی خوڵقاندووە، وەك ئەو گرنگیە زۆرەی لەئاستی دەولیدا بە كەیسی كوردستان درایەوە، بەڵام لەپاڵ ئەو دەرەفەتەدا، هەڕەشەش خوڵقاون، یان راستتر بڵێین ئەو هەڕەشانەی سەد ساڵە بەهۆی وڵاتانی داگیركەری كوردستان و خەمساردی و پشتگوێخستنی كۆمەڵگای نێودەوڵەتی بۆ ئەو هەڕەشانە هەبوون و لە چەندساڵی رابردوودا سڕكرابوون، جارێكی تر سەریانهەڵدایەوە، كۆبوونەوەی هاوبەشی سێ وەزیرەكەی بەغدا و تاران و ئەنقەرە لە نیۆیۆرك دەركەوتەیەكی ئەو هەڕەشانەن.
سەرنجی من لەسەر ئەوە نییە، ئەو وڵاتانە هەڕەشە ئەكەن یان نا، چونكە هەرلەسەرەتاوە ئەوەمان ئەزانی، بەڵام سەرنج لەسەر ئەوەیە كە وڵاتێكی زلهێزی وەك ئەمریكا، ئەو هەڕەشانە لەئێمە ووردتر و باشتر ئەزانێ و حازریشە بە ئاماژەی جۆراوجۆر بە ئێمەی نیشان بدا و بشمان ترسێنێ، بەڵام هیچ ئاماژەیەك ناداتە ئەوانەی هەڕەشەمان لێ ئەكەن، ئایا ئەمە گلۆپی سەوزە بۆ ئەو وڵاتانە، بۆئەوەی ئەگەر خەڵكی كوردستان (( چەتوون بوون )) و لەسەر داخوازی رەوای خۆیان پێداگریان كرد، ئەوان دەستكراوەبن كە چۆن چۆنێك ویستیان (( كوردەچەتوونەكان )) تەمێ بكەن و رابگرن.
رەنگە ئەم وتەبێژەی وەزارەتی دەرەوە، ئەو مێژووەی 1991 ی لەبەردەست نەبێ، كاتێ كە ئەمریكا گڵۆپی سەوزی بۆ هێزەكانی سەدام حسێن پێكرد تا راپەڕینی گەلی كوردستان خوێناوی بكا و لەباری ببا، بەڵام ئێمە بیرمانە، چونكە چەندین هەزار هاووڵاتی بوونە قوربانی و كۆڕەوی ملیۆنیشی لێ كەوتەوە.
سەركردایەتی سیاسی كوردستان، پرۆژە چارەسەرەكەی رەتنەكردووەتەوە، كە وەك باس ئەكرێ هی ئەمریكا و نەتەوە یەكگرتووەكانە، بەڵكو داوای زەمان و زەمانەتی دەستنیشانكراو و كۆنكرێتی ئەكا، بەتایبەت زەمانەت لەلایەن دەوڵەتی عیراقەوە، كە لە پرۆژەكەدا نییە ( پرۆژەكە هێندەی من ئاگام لێی بێ، هیچ لایەنێكی رەسمی دەقەكەی بڵاونەكردووەتەوە و من تەنیا لە رێگەی میدیاوە بینیومە).
هەندێ نووسەر و سیاسەتوانی كوردیش دڵخۆشی خۆیان بە پرۆژەكە دەربڕیوە، بێ ئەوەی شەیتانەكانی ناو تەفاسیلی پرۆژەكەیان دۆزیبێتەوە و هەست پێكردبێ. بێ ئەوەی لەبەرامبەر ئەو دەستكەوتانەی وتەبێژەكەی دەرەوەی ئەمریكا ئاماژەی پێداون، ئەو دەرفەت و دەستكراوەییانەی لە پشتی سەراپای پرۆژەكەدا بۆ دەوڵەتی عیراق هەن لەگەڵ ئەو (( دەرفەتانە)) ی بە قسەی وتەبێژەكە، بۆ كوردستانی تیایە بەراورد بكەن و ببینن كە تا چ ئەندازەیەكی مەترسیدار لاسەنگە.
دەی با بڵێین ئەمەش هەر نەیسە
بەڵام ئایا عیراق هیچ پابەندیێكی بە پرۆژەكە نیشان داوە؟ چونكە عیراق، كە هەموولایەك بە ئەمریكاشەوە روون ئەزانین، سەروەری و بڕیاری سیاسی لەدەست خۆیدانیە، بۆیە ئاخۆ پرۆژەكە لای ئەوان بۆچارەسەرە یان دواجار لەناو فەوزای ئەم ناوچەیەدا، بۆ مەبەست و ئامانجی تری دژ بە كوردستان بەكار ئەهێنەرێ ؟
بە داخەوە هەندێ كەس و نووسەری لای خۆشمان وای لێك ئەدەنەوە، كە ئەمە دەرەفەتەو دەرگاكردنەوەیە بەسەر چارەسەری كۆنفیدراڵیدا، بێ ئەوەی ئاماژەكان و گەرەنتییەكانی كۆنفدراڵیش نە لە پرۆژەكە و نە لە خوێندنەوەی نیەتی ئەمریكا و نەتەوەیەكگرتووەكاندا دەستنیشان كرابن و دیاربن.
هێندێ جار مرۆڤ وای ئەخوێنێتەوە و لێكی ئەداتەوە، پرۆژەكە ، كە دەهۆڵی بۆ ئەكوترێ، بایی پینەو پەڕۆی فیدراڵیە شڕوپڕەكەی ئێستاش ناكات. گووشارەكان زۆرن، هەڕەشەكانیش هەروا، قسەی لوس وجوانیش زۆرن، بەڵام گەرەنتی نا.