بەهۆی سەرماوە لە کەرکووک دوو رۆژ کرایە پشوو

 

نووسينگەی راگەیاندنی پارێزگای کەرکووک دەڵێت: "بەهۆی دابەزینی پلەکانی گەرماوە و لە پێناو پاراستنی قوتابیان و خوێندکاران، بەڕێز رێبوار تەها پارێزگاری کەرکووک، بڕیاریدا دووشەممە و سێشەممە لە خوێندنگاکانی سەرەتایی و ناوەندی و ئامادەیی و ستافی مامۆستایان پشوو فەرمی بێت."

 

لە رۆژی چوارشەممەوە، شەپۆلێکی بەفر و باران ناوچەکانی هەرێمی کوردستانی گرتووەتەوە، بەو هۆیەوە دوێنێ، پارێزگای هەڵەبجە رایگەیاند، بەهۆی بەفربارین و سەرماوە، یەکشەممە، 23-02-2025، لە سەرجەم ناوەندەکانی خوێندن لە سنووری تەوێڵە و بیارە پشووی فەرمییە.

 

پاریزگای هەڵەبجە بڵاویکردەوە، "لەسەر پێشنیازی ئازاد تۆفیق، پارێزگاری هەڵەبجە، بڕیاردرا پشوو لە تەوێڵە و بیارە درێژبکرێتەوە و سبەینێش بکرێتە پشوو."

 

ئەو پشووە، خوێندکارانی دەرەکیی پۆلی 12 ناگرێتەوە.

 

دوێنێ لە چۆمانیش کرایە پشوو. ئەمڕۆ یەکشەممە، قایمقامی چۆمان بە تۆڕی میدیایی رووداوی گوت، "پشوو درێژکرایەوە و سبەی لە تەواوی خوێندنگە و فەرمانگە حکومییەکان پشووە."