بەڕێوەبەرایەتیی خۆسەر: کۆبانێ لەبەردەم کارەساتێکی مرۆیی راستەقینەدایە

 

لە راگەیێندراوەکەی بەڕێوەبەرایەتیی خۆسەردا هاتووە، کۆبانی سیمبووڵی بەرخودان و خۆڕاگرییە و ناوەکەی لە یادەوەری سوورییەکان و جیهاندا هەڵکۆڵراوە، ئەوەش بەهۆی ئەو قوربانییە گەورانەی لەپێناو بەرگریکردن لە مرۆڤایەتی دژی تیرۆر پێشکێشی کردووە. 

 

بەڕێوەبەرایەتیی خۆسەر دەڵێت: "کۆبانی هێڵی یەکەمی بەرگری بوو لە بەها مرۆییەکان و وەرچەرخانێکی مێژوویی بوو کە رێڕەوی شەڕی دژی تووندڕۆیی گۆڕی." 

 

هەروەها جەخت دەکاتەوە کە "بەئامانجگرتنی ئێستای کۆبانی، بەئامانجگرتنی راستەوخۆی ئیرادەی گەلانی ئازاد و ئەزموونی دیموکراتییە لە ناوچەکەدا."

 

 

بەڕێوەبەرایەتیی خۆسەر جەخت لە "پێویستیی هەرە لەپێش" دەکاتەوە بۆ دۆزینەوەی چارەسەرێکی خێرا و دەستبەجێ، لەوانەش کردنەوەی رێڕەوی ئارام بۆ گەیاندنی هاوکارییە مرۆیی و پزیشکییەکان، دابینکردنی چارەسەر بۆ برینداران و دابینکردنی پێداویستییە بنەڕەتییەکان بۆ دانیشتووانە گەمارۆدراوەکە، بێ ئەوەی هیچ مەرج و کۆتوبەندێک دابنرێت.

 

 

لە راگەیێندراوەکەدا بەرپرسیارێتییەکی یاسایی و ئەخلاقی خراوەتە سەر شانی کۆمەڵگەی نێودەوڵەتی، نەتەوە یەکگرتووەکان و سەرجەم رێکخراوە مرۆیی و مافپەروەرەکان، تاوەکو دەستبەجێ دەستوەردان بکەن بۆ راگرتنی ئەو هێرشانەی دەکرێنە سەر ناوچەکانی کانتۆنی جەزیرە، کە "هەڕەشە لە سەقامگیری و ئاشتیی کۆمەڵایەتی دەکەن و مەینەتییە مرۆییەکان قووڵتر دەکەنەوە."

 

 

بەڕێوەبەرایەتیی خۆسەر ستایشی "بەرخودانی میللیی پاڵەوانانە"ی دانیشتووانی حەسەکە و تەواوی ناوچەکانی کانتۆنی جەزیرە دەکات و سڵاو بۆ یەکڕیزی و خۆڕاگرییان بەرامبەر هێرشەکان دەنێرێت. رایگەیاندووە، "ئەم هەڵوێستە نیشانەی هۆشیاریی گەل و پێداگرییانە لەسەر پاراستنی خاک و پڕۆژە دیموکراتییەکەیان."

 

 

لە کۆتایی راگەیێندراوەکەدا، داوا لە خەڵک کراوە ئاستی بەرخودانی میللیی رەوا بەرز بکەنەوە و هەموو وزەکان کۆبکەنەوە بۆ پاراستنی دەستکەوتەکان کە بە خوێنی شەهیدان بەدەستهاتوون، تاوەکو داهاتووی نەوەکانی داهاتوو لە ئازادی و کەرامەت و پێکەوەژیاندا بپارێزرێت.

 

بەڕێوەبەرایەتیی خۆسەر هۆشداری دەدات و دەڵێت: "بێدەنگی بەرامبەر ئەوەی روودەدات هاوکارییە لە تاوانەکەدا، دەستوەردانی بەپەلەی ئەمڕۆش بەرپرسیارێتییەکی مرۆییە و نابێ دوابخرێت."