کۆریای باشوور بە نیو ملیۆن دۆلار هاوکاری پارێزگای سنە دەکات

 

 

دووەمین کۆبوونەوەی ساڵانەی لیژنەی پەرەپێدانی تواناکانی بەڕێوەبەرایەتیی پێگەیاندنی تەکنیکی و پیشەیی پارێزگای سنە، رۆژی سێشەممە 23-12-2025 بە ئامادەبوونی جون پیو کیم، باڵیۆزی کۆریای باشوور لە تاران بەڕێوەچوو و تێیدا هاوکاری حکومەتی کۆریای باشوور بەخشرایە پارێزگای سنە.

 

باڵیۆزی کۆریای باشوور رایگەیاند، هاوکارییەکە بایی نزیکەی 500 هەزار دۆلارە و دەدرێتە بەڕێوەبەرایەتیی پێگەیاندنی تەکنیکی و پیشەیی پارێزگای سنە تاوەکو خوێندکاران بەشێوەیەکی باشتر لە بواری پیشەیی و تەکنیکی پێ بگەیێندرێن.

 

جون پیو کیم گوتی، ئەو هاوکارییە پیشانی دەدات، سەردانی مەیدانیی باڵیۆزی کۆریای باشوور دەتوانێ دەستکەوتی هەبێت و حکومەتی کۆریای باشوور گرنگی بە هاوکاریی کردەیی و کاریگەر دەدات.

 

پارێزگاری سنەش سوپاسی حکومەتی کۆریای باشوور دەکات بۆ ئەو هاوکارییە و دەڵێ، بەسوود دەبێ بۆ پارێزگاکە.

 

ئارەش لهۆنی، پارێزگاری سنە لە رێوڕەسمی وەرگرتنی هاوکارییەکەی کۆریای باشووردا گوتی، بەخشینی ئەو هاوکارییە دەتوانێت دەرفەتێکی بەنرخ بڕەخسێنێت بۆ پەرەپێدانی پەروەردەکردنی گەنجان لەبواری تەکنیکی و هەنگاوێکی گەورەیە لە چوارچێوەی گەشەپێدانی توانای مرۆیی پارێزگاکە.

 

باڵیۆزی کۆریای باشوور لە ئێران لە ئایاری 2025 سەردانی پارێزگای سنەی کرد و رایگەیاند، حکومەتی وڵاتەکەی ئامادەیە پەرە بە پەیوەندییە کولتووری، گەشتیاری و ئابوورییەکانی لەگەڵ ئەو پارێزگایە بدات. 

 

لە مانگی تشرینی یەکەمی ئەم ساڵ، سەرۆکی ژووری بازرگانی و پیشەسازیی پارێزگای سنە رایگەیاند، کۆریای باشوور بڕیاریداوە بە 500 هەزار دۆلار هاوکاری پارێزگای سنە بکات لە بواری پەرەپێدانی ژێرخانەکانی پەروەردەی تەکنیکی و پیشەیی لەو پارێزگایە.