بازاڕی تاناکۆرای شاری مهاباد چۆڵە: خەڵک پارەی خواردنیان نییە چ جای جلوبەرگ

 

لە دوایین مانگی زستاندا، کە ساڵانی رابردوو بازاڕەکە پڕ دەبوو لە کڕیار بۆ ئامادەکاریی نەورۆز، ئەم ساڵ بێدەنگی باڵی بەسەردا کێشاوە.

 

ئیسماعیل ئیبراهیمزادە، دووکاندارێکی بەتەمەنی بازاڕەکەیە و دەڵێت: "دۆخی بازاڕ لەوپەڕی خراپیدایە؛ گرانیی خۆراک گەیشتووەتە ئاستێک خەڵک پارەی ئەوەندەیان نامێنێتەوە بیدەن بە جلوبەرگ."

 

مەسعود، دووکاندارێکی دیکەیە و نیگەرانە لەوەی "تاوەکو ئێستا رووینەداوە بەرەو نەورۆز بڕۆین و هیچ فرۆشێکمان نەبێت."

 

بێبازاڕی وایکردووە بەشێک لە کاسبکاران نەتوانن کرێی دووکانەکانیان بدەن. عوسمان رەمەزانی دەڵێت: "دووکاندار هەیە دوو مانگە کرێی نەداوە و خاوەن دووکانەکان لە ناچاریدا چاوەڕێ دەکەن تاوەکو بازاڕ دەکرێتەوە."

 

کێشەیەکی دیکەی کاسبکاران بڕینی ئینتەرنێتە، چونکە پشتیان بە فرۆشتنی ئۆنلاین بەستبوو. مەسعود ئاماژە بەوە دەکات: "پەیجەکەمان 70 هەزار فۆڵۆوەری هەبوو، بەڵام بەهۆی بڕانی ئینتەرنێتەوە تەواو ناچالاک بووە و زیانی زۆرمان کردووە."

 

بازاڕی تاناکۆرای مەهاباد لەسەر رووبەری سێ هێکتار دروستکراوە و لە دوو نهۆم و نزیکەی 1500 دووکان پێکهاتووە.