یەکێتی و کۆمەڵی دادگەری: هەموو هەوڵێک بۆ چارەسەرکردنی بژێویی مووچەخۆران بخرێنەگەڕ

 

ئەمڕۆ شەممە، 25ـی تشرینی دووەمی 2023، بافڵ جەلال تاڵەبانی، سەرۆکی یەکێتیی نیشتمانیی کوردستان بە سەرۆکایەتی  شاندێکی باڵای یەکێتی سەردانی کۆمەڵی دادگەریی کوردستانی کرد و لەلایەن عەلی باپیر، سەرۆکی کۆمەڵی دادگەری و شاندێکی باڵای کۆمەڵی دادگەرییەوە پێشوازی لێکرا.

 

لەبارەی کۆبوونەوەی نێوانیان، هەردوولا راگەیێندراوێکی هاوبەشیان بڵاوکردەوە، تێیدا هاتووە: "لە کۆبوونەوەیەکدا گفتوگۆ دەربارەی بارودۆخی سیاسی هەرێم و عێراق و ناوچەكە كرا و جەختیش كرایەوە لە پێویستیی پاراستنی بەرژەوەندییە باڵاكانی خاك و خەڵكی كوردستان، هەموو لایەنەکانیش پێکەوە هەوڵەکانیان بخەنەگەڕ بۆ چارەسەرکردنی ریشەیی بژێوی هاووڵاتییان بەگشتی و مووچەخۆران بەتایبەتی." 

 

هەر لە کۆبوونەوەکەدا یەکێتی و کۆمەڵی دادگەری "بە پەرۆشەوە جەختیان کردەوە لە درێژەدان بە گفتوگۆ و دیالۆگی نیشتمانیی لە هەرێم بە شێوەیەک لەبەرامبەر پرسە چارەنووسسازەکان کۆدەنگی نیشتمانیی دروست بکرێت و یەک گوتاری نیشتمانیی ئاڕاستەی بەغدا بکرێت کە سەرچاوەکەی دیدگای باڵای کوردستانی بێت کە بۆئەوەش یەکخستنی هەوڵەکان و لابردنی بەربەستەکانی بەردەم پەیوەندی لایەنە سیاسیەکانی هەرێم بە پێویست زانرا."

 

هەر بەگوێرەی راگەیێندراوە هاوبەشەکە، دۆخی نەخوازراوی ناوچەکە، پرسی هەڵبژاردن دوو تەوەری تری کۆبوونەوەکە بوون "کە بە وردی تاوتوێکران و دووپات لە پاراستنی سەقامگیری ئاسایش و ئارامی هەرێم، لابردنی ئاستەنگەکانی بەردەم هەڵبژاردن کرایەوە بە شێوەیەک هەموو هەوڵەکان بخرێنە گەڕ تا هەڵبژاردنێکی پاک و بێگەرد کە وەڵامدەرەوەی خواستی هەمووان بێت لە کاتی خۆیدا بەڕێوەبچێت."