چوونی خەڵک بۆ چەند ناوچەیەکی شرنەخ قەدەخە کرا

 

 

بەگوێرەی راگەیێندراوێک، کە ئەمڕۆ چوارشەممە 26ـی ئاداری 2025 لەلایەن پارێزگای شرنەخ بڵاوکراوەتەوە، ناوچەکانی چیای جودی، بەستا، چیای گابار و هەندێک ناوچەی دیکە وەک "ناوچەی ئەمنیی تایبەت" ناسێندراون و بۆ ماوەی 15 رۆژ چوون و هاتنی خەڵک بۆ ئەو ناوچانە قەدەخە کراوە.

 

بڕیاری قەدەخەکردنەکە لە ئەمڕۆ چوارشەممە 26ـی ئادار 2025 دەستیپێکردووە و تاوەکو 9ی نیسانی 2025 بەردەوام دەبێت.

 

پارێزگەی شرنەخ رایگەیاندووە، بە مەبەستی پاراستنی ئاسایشی نەتەوەیی، دەستەبەرکردنی سەلامەتی گشتی، رێگری لە تاوان و پاراستنی ماف و ئازادییەکانی دیکە، ئەو ناوچانە وەک ناوچەی ئەمنیی تایبەت راگەیێندراون و داوای لە خەڵکی کردووە بۆ پاراستنی سەلامەتی خۆیان پابەندی بڕیارەکە بن و سەردانی ئەو ناوچانە نەکەن. 

 

سوپای تورکیا لەم دواییانەدا ئۆپەراسیۆنە سەربازییەکانی دژ بە گەریلاکانی پەکەکە لەسەر سنووری باکوور و باشووری کوردستان و چەند پارێزگایەکی دیکەی باکووری کوردستان زیادکردووە، بەو هۆیەوە قەدەخەی هاتووچۆ و ناوچەی ئەمنیی تایبەت لە ناوچەکەدا رادەگەیێنرێت.