دەستەی مافی مرۆڤ: لاهوور شێخ جەنگی گوتی لە زیندان ئەشکەنجە نەدراوم

 

 

بابەتێکی گرنگی دیکە ئەوە بوو، کە بەپێی راگەیێندراوەکە، لاهوور شێخ جەنگی رایگەیاندووە، لەکاتی دەستگیرکردن و بردنیدا بۆ گرتووخانەی کانی گۆمە، هیچ جۆرە تووندوتیژی و ئەشکەنجەیەکی بەرامبەر نەکراوە، هەروەها لەکاتی لێکۆڵینەوەکانیشدا هیچ کامێرا و ئامێرێکی تۆمارکردن بەکارنەهاتووە و دانپێدانانی بەزۆری لێ وەرنەگیراوە.

 

 

سەبارەت بە لایەنی یاسایی و سیاسیی دۆسییەکەی، لاهوور شێخ جەنگی داوای کردووە کە کەیسەکەی بە رێکاری یاسایی ئاسایی خۆیدا بڕوات، لە هەمان کاتدا داوای لە دەستەی مافی مرۆڤ کردووە کە چاودێریی بەردەوامی دۆسیەکەی بکەن. لە لایەکی دیکەوە، ئاشکرای کردووە کە پێشتر و زووتر، نوێنەرانی وڵاتانی ئەمریکا، بەریتانیا و فەرەنسا، هەروەها حکومەتی هەرێمی کوردستانی لە ئەگەری روودانی ئەو رووداوانە ئاگادار کردبووەوە.

 

شاندەکەی دەستەی مافی مرۆڤ تەنها چاویان بە لاهوور شێخ جەنگی نەکەوتووە، بەڵکو لەگەڵ بەشێک لەو 162 کەسەی دیکەشدا کۆبوونەتەوە کە وەکو ئەندامی هێزەکانی ناوبراو دەستگیر کراون.

 

بەپێی زانیارییەکانی ئاسایش، لە ئەنجامی رووداوەکاندا 5 کەس لە هەردوولا کوژراون. دەستگیرکراوانی دیکەش ئاماژەیان بەوە کردووە کە شوێنیان گونجاوە و رووبەڕووی تووندوتیژی نەبوونەتەوە.

 

دەستەی مافی مرۆڤ جەختی کردووەتەوە کە مافی لاهوور شێخ جەنگییە پارێزەرەکانی بیبینن و بڕیارە ئەم پرسە بە زوویی چارەسەر بکرێت. لە کۆتاییشدا، دەستەکە داوا لە کەسوکاری هەر کەسێکی بێسەروشوێنی ئەو رووداوانە دەکات، سەردانی نووسینگەی سلێمانییان بکەن.

 

دەقی راگەیێندراوەکە:

 

رۆژی سێشەمه 26ی ئاب شاندێکی باڵای دەستەی سەربەخۆی مافی مرۆڤ بە راسپاردەی د. مونا یاقۆ، سەرۆکی دەستە سەردانی شاری سلێمانییان کرد. شاندەکە لە گرتووخانەی کانی گۆمە چاویان کەوت بە لاهوور شێخ جەنگی لە نزیکەوە و گفتوگۆیان لەگەڵ کرد دەربارەی رەوشی تەندروستی و شوێنی حەوانەوە و رێکارەکان پرسیاریان لێ کرد.

 

ناوبرا ئاماژەی بەوە کرد تەندروستی باشە و لە ژوورێکی تایبەت دانراوە و تەواوی پێداویستییەکانی بۆ دابینکراوە، هەروەها بەڤیدیۆ لەگەڵ خێزانەکەی قسەی کردووە و داوای پەرتووکی کردبوو لە ئاسایش کومەڵێک پەرتووکیان بۆ هێناوە، ئاماژەی بەوەش کرد لەوکاتەی کە هاتووە بۆ زیندانی ئاسایش لە کانی گۆمە، رووبەڕووی هیچ توندوتیژی و ئەشکەنجەیەک نەبووەتەوە.

 

دواتر لاهوور شێخ جەنگی داوای کردووە کە دۆسییەکەی بە رێکاری یاسایی بڕوات و دەستەش چاودێری بکات.

 

هەروەها لەسەر رووداوەکانی ئەو رۆژە گوتی زووتر نوێنەرانی وڵاتانی ئەمریکا و بەریتانیا و فەرەنسا و حکومەتی هەرێمی کوردستانی لێ ئاگادار کردووەتەوە کە ئەو رووداوانە روودەدەن.

 

دەستەی مافی مرۆڤ ئاماژەیان بەوەدا مافی ناوبراوە رێگە بە پارێزەرەکانی بدرێ سەردانی بکەن و بڕیارە لە ماوەیەکی نزیکدا ئەو پرسەش چارەسەر بکرێ و رێگە بدرێ بە سەردانی پارێزەرەکان.

 

هەروەها ئاماژەی بەوە کردووە کە لەکاتی لێکۆڵینەوەکان هیچ توندوتیژیەکی بەرامبەر نەکراوە و هیچ دانپێدانێکی بەزۆری لێ وەرنەگیراوە هەروەها لە وەڵامی پرسیاری تیمی دەستە سەبارەت بە ڤیدیۆکردن لەکاتی لێکوڵینەوە، گوتی هیچ کامێرا و ئامێری تۆمارکردن نەبووە لەکاتی لێکۆڵینەوە.

 

دواتر تیمەکەی دەستە چاویان بە بەشێک لە دەستگیراوەکان کەوت کە وەک ئەندامی هێزەکەی لاهور شێخ جنگی ناسراون و بەپێی بەدواداچونی شاندەکەی دەستە ژمارەیان 162 کەسن و ئاسایش گوتی ژمارەی کوژراوەکانی هەردوولا پێنج کەسن هەروەها ئاماژەیان پێکرد کە رۆژانە رێگە بە بەشێک لە کەسوکاریان دراوە سەردانیان بکەن وە ئاماژەیان بەوە کردووە لە ئێستادا شوێنیان باشە لەو کاتەی هێنراونەتە ئاسایش، رووبەڕووی هیچ توندوتیژیەک نەبوونەتەوە.

 

دەستەی مافی مرۆڤ رایدەگەیێنێت، هەر کەسێکی نادیار و بێسەروشوێنە لەو رووداوە دەتوانێ سەردانی نووسینگەی سلێمانی مافی مرۆڤ بکات بۆ سۆراخکردنی کەسەکانیان.

 

جێی باسە دەستەی سەربەخۆی مافی مرۆڤ یەکەم دامەزراوەی فەرمیە دوای رووداوەکانی سلێمانی سەردانی دەستگیرکراوانی کردبێت.

 

دەستەی سەربەخۆی مافی مروڤ لەهەرێمی کوردستان

26-8-2025