لە هەولێر دزی لە کۆشکێکی فرۆشتنی کتێب و رۆژنامە دەکرێت

 

 

ئاشتی شێرکۆ، خاوەنی خانەی ئاشتی لە بازاڕی شێخەڵڵای شاری لە هەولێر  دەڵێت شەوی 25ی ئەیلوولی نزیکەی 500 مەلزەمەی خوێندن، کە بایی نزیکەی یەک ملیۆن دینار بوون، لێدزراوە و دەڵێت دزەکان کتێب و رۆژنامەیان جێهێشتووە و تەنیا مەلزەمەکانییان دزیوە.

 

ئاشتی شێرکۆ، خاوەنی خانەی ئاشتی بە تۆڕی میدیایی رووداوی راگەیاند: "کاژێر حەوتی بەیانی ئەمڕۆ 26ی ئەیلوول کاتێک براکەم دەچێت بۆ ئەوەی کۆشکەکە بکاتەوە دەبینێت هەموو کەلوپەلەکان لەو ناوە کەوتوون و هەرچی مەلزەمەکان هەیە کە هی هەموو پۆلەکان بوون دزراوە، شتی دیکە نەبراون". 

 

بە گوتەی ئاشتی لە ماوەی رابردوودا ئەوە سێیەم جارە دزی لە کۆشکەکەی دەکرێت و گوتی: "دزییەکە دوای سەعات 12ی شەوی رابردوو کراوە، ئەوانەی دزییەکەیان کردووە دیارە عەرەبانەی سێ تایەیان بەکارهێناوە و دوای بردنی مەلزەمەکان، عەرەبانەکەیان جێهێشتووە".

 

سەبارەت بە تۆنارکردنی سکاڵا، ئاشتی شێرکۆ گوتی: "بە نیاز نیم سکاڵا تۆماربکەم، بەڵام بەدواداچوون دەکەم و دەمەوێ خۆم بزانم کە ئەو دزییە بۆ و کێ کردوویەتی".ئاشتی شێرکۆ گوتیشی: "دزەکە زانیویەتی مەلزەمە یەکسەر دەفرۆشرێت و پارە دەکات، بۆیە تەنیا مەلزەمەیان بردووە".

 

لە ماوەی رابردوو لە هەولێر ژن و پیاوێکی بیانی بە تۆمەتی دزینی کتێب، لەلایەن پۆلیسەوە دەستگیرکران.