لە ئامەد بۆمب بە ئۆتۆمبێلێکی پۆلیسدا تەقییەوە

 

پارێزگای ئامەد لە هەژماری فەرمی خۆی بڵاویکردەوە، ئێوارەی رۆژی پێنجشەممە، 26ی ئاداری 2026، کاژێر 18:34 لە یەکتربڕی شەقامی قامشلۆ و کۆڵانی نەورۆز، بۆمبێکی دەستکرد بە ئۆتۆمبێلێکی پۆلیسدا تەقیوەتەوە.

 

لە راگەیێندراوەکەی پارێزگای ئامەددا هاتووە: "لە لێکۆڵینەوە سەرەتاییەکاندا دەرکەوتووە، ئۆتۆمبێلێکی مەدەنیی پۆلیس کە بە ناوچەکەدا تێپەڕیوە، بەسەر کیسەیەکدا رۆیشتووە کە لە لێواری رێگەکە دانرابوو و تەقەمەنیی دەستکردی تێدابووە. لەو کاتەدا تەقینەوەکە روویداوە، بەڵام هیچ برینداربوونێک نەبووە و زیانیش بەر ئۆتۆمبێلەکە نەکەوتووە."

 

سەبارەت بە وردەکاریی دانانی بۆمبەکە، پارێزگا ئاماژەی بەوە کردووە کە کامێراکانی چاودێری گرتەی کەسێکیان تۆمار کردووە کە کاژێر 18:21 بە ماتۆڕسکیلێک ئەو کیسەیەی لە لێواری رێگەکە داناوە. دوای دانانی کیسەکە، چەندین ئۆتۆمبێلی دیکەش بە هەمان رێگەدا تێپەڕیون و تەقینەوەکە نزیکەی 12 خولەک دواتر روویداوە.

 

بەگوێرەی لێکۆڵینەوەکان، لە سیستمی تەقەمەنییەکەدا هیچ میکانیزمێکی کۆنترۆڵکردن لە دوورەوە نەدۆزراوەتەوە. هەر بۆیە پارێزگای ئامەد دەڵێت: "لەەم قۆناخەدا هیچ بەڵگەیەک نییە کە ئۆتۆمبێلی پۆلیس راستەوخۆ کرابێتە ئامانج."

 

دوای رووداوەکە، سەرۆکایەتیی داواکاری گشتیی ئامەد دەستی بە لێکۆڵینەوە کردووە و هێزە ئەمنییەکانیش لە هەوڵی ناسینەوە و دەستگیرکردنی ئەو گومانلێکراوەدان کە بە ماتۆڕسکیلەکە تەقەمەنییەکەی لەو شوێنە داناوە.