دەزگای هەڵبژاردنی پارتی و یەکێتی کۆدەبنەوە

 

لەبارەی هەمواری یاسای هەڵبژاردنیش، لوقمان وەردی گوتی، "ئەوەی ئێمە بزانین پارتی رازییە لەسەر بازنەکانی هەڵبژاردن، بەڵام دەبێ بەیەکەوە بگەینە سازانێک لەسەر هەمواری یاساکە." 

 

لەبارەی ناکۆکییەکانی پارتی و یەکێتیش، لوقمان وەردی ئاماژەی بەوەکرد، "ئێمە لە پەرلەمان بەردەوام پەیوەندیمان هەیە و رۆژانە گفتوگۆ دەکەین، گرفتەکە تەنیا هەڵبژاردن نییە، گرفتی دارایی و گەمارۆی ئابووری سەر سلێمانی و دابەشکردنی داهات گرفتی گەورەیە، بنەماکانی شەراکەت لە نێو حکومەت بە تەواوی پێشێلکراوە، کاری حیزبایەتی بە تەواوی لەنێو حوکمڕانیدا رەنگیداوەتەوە، لەمدواییە کاتێک بڕیاربوو هەردوو مەکتەبی سیاسیی کۆببنەوە، لەلایەن دادگەی ئاسایشی هەولێرەوە بۆمبێک تەقێنرایەوە و کۆبوونەوەکە پەکیکەوت." 

 

هاوکات، عەلی حوسێن، بەرپرسی مەکتەبی رێکخستنی سلێمانی - هەڵەبجەی پارتی دیموکراتی کوردستان لە کۆنگرەیەکی رۆژنامەڤانیدا رایگەیاند، لە دوای کۆنگرەی 14ـوە پارتی دەستپێشخەری کردووە و دەرگای کردووەتەوە، سەردانی هەموو حیزبەکانی کردووە بە یەکێتیشەوە، "ئێمە چاوەڕوانی ئەوانین کە وەڵامی سەردانەکەمان بدەنەوە و سەردانمان بکەن بۆ ئەوەی گفتوگۆ لەسەر ئەو پرسانە بکەین، بەتایبەتی ئەوانەی پەیوەندییان بە هەڵبژاردنەوە هەیە، چونکە چیدی کات نەماوە بۆ ئەوەی کاتی هەڵبژاردن دوابخەین."