پۆلیسی ورمێ: 50 کەس بە تۆمەتی ساردکردنەوەی خەڵک لە دەنگدان دەستگیرکراون

 

رەحیم جەهانبەخش، فەرماندەی پۆلیسی پارێزگای ورمێ، شەوی 28-02-2024 رایگەیاند "بەلاڕێدابردنی بیروڕای گشتی و هاندانی خەڵک بۆ بەشدارینەکردن لە هەڵبژاردن، پڕوپاگەندەی نەرێنی و بڵاوکردنەوەی بابەتی ناڕاست، وەک سەرپێچییەکانی هەڵبژاردن لە قەڵەم دەدرێن و بەپێی یاسا بەرەنگاری ئەو کەسانە دەبینەوە کە ئەو جۆرە کارانە دەکەن."

 

جگە لە دژبەرانی کۆماری ئیسلامی ئێران، خەڵکێکی زۆریش لە ئێران و رۆژهەڵاتی کوردستان بەشداریی لە هەڵبژاردن بێسوود دەزانن و داوایان کردووە خەڵک نەچنە سەر سندووقەکانی دەنگدان و هەڵبژاردن بایکۆت بکەن.

 

هەڵبژاردنی خولی دوازدەیەمی پەرلەمانی ئێران رۆژی هەینی 01-03-2024 بەڕێوەدەچێت. بەپێی پێشینی هەندێ ناوەندی راپرسی رێژەی بەشداریکردن کەم دەبێت، بەڵام بەرپرسانی حکومەت دەڵێن خەڵک پێشوازیی باشیان لە هەڵبژاردن کردووە و رێژەی بەشداریی زۆر دەبێت.

 

لە هەڵبژاردنی خولی رابردوودا 42٪ـی خەڵک بەشدارییان لە هەڵبژاردندا کردبوو.