دیوانی وەزارەتی کارەبا: بەو بڕەی لەبەردەستدایە 30٪ـی کارەبای هەرێمی کوردستان دابین دەکرێت
رووداو دیجیتاڵ
بەڕێوەبەری گشتیی دیوانی وەزارەتی کارەبا رایگەیاند، ئێستا 1400 بۆ 1500 مێگاوات کارەبا لەبەردەستە کە دەکاتە 30%ـی کۆی پێویستیی کارەبای هەرێمی کوردستان و گوتیشی: لە دوای دەستپێکردنەوەی بەرهەمهێنانی گاز لە کۆرمۆر بەگوێرەی پلان لە ماوەی 24 بۆ 48 کاژێر کارەبای پێیویست بە هاووڵاتییان دەدرێتەوە.
ئەمڕۆ شەممە، ئەردەلان دۆسکی، بەڕێوەبەری گشتیی دیوانی وەزارەتی کارەبا بە تۆڕی میدیایی رووداوی راگەیاند، "ئەو 1400 مێگاوات بۆ 1500 مێگاواتەی ئێستا لەبەردەستە زیاتر بە کەرتە خزمەتگوزارییەکانی وەک نەخۆشخانە و تۆڕەکانی ئاو دەدرێت و ئەوەی دەمێنێتەوە بە دادپەروەرانە بەسەر هاوبەشانی کارەبادا دابەش دەکرێت."
شەوی چوارشەممە 26ـی مانگی 11، نزیک کاژێر 11:30، هێرشکرایە سەر کێڵگەی کۆرمۆر و بەهۆیەوە ئاگر لە کۆگەیەکی گەورەی کێڵگەکە کەوتەوە.