چارەسەری سرووشتی بۆ قوڕگئێشە

 
رووداو- ئاژانسەکان 

قوڕگئێشە یەکێکە لە لێکەوتەکانی پەتا وەرزییەکانی وەک هەڵامەت و ئەنفلۆنزا، هەندێکجاریش هەوکردنێکی بەکتریاییە. زۆربەی حاڵەتەکان دەکرێ هەر لە ماڵەوە مامەڵەیان لەگەڵ بکرێ و پێویست بە سەردانی نەخۆشخانە ناکات و لەماوەی هەفتەیەکدا چاکدەبنەوە. 
 
رێگاکانی مامەڵەکردن لەگەڵی لە ماڵەوە: 
1- دەرمانە هێورکەرەوەکانی تا و ئازار: وەک پاراسیتۆڵ و پرۆفین، بەڵام ئەو کەسانەی گرفت لە گەدەیان هەیە باشترە لە پرۆفین دووربن، مەگەر پزیشک بۆیان دیاری بکات. ئەوانەش کە گرفتی جگەریان هەیە پاراسیتۆڵ بەبێ رێنمایی پزیشک نەخۆن. 
2- زۆر خواردنەوەی شلەمەنی: مەرج نییە گەرم بن، شلەمەنی ساردیش بۆ ئەم حاڵەتە باشە 
3- خواردنی نەرم و فێنک لە ژەمەکانت بخۆ 
4- وەستاندنى جگەرەکێشان و دووربوون لەو شوێنانەی جگەرەیان تێدا دەکێشرێ. 
5- غەرغەرە بە خوێواو: نیو کەوچکە چا خوێ بکە نێو پەرداخێک ئاو و لە دەم و گەرووتدا غەرغەرەی پێ بکە. ئەمەیان بۆ منداڵ گونجاو نییە و تەنیا بۆ گەورەکانە. 
6- چای سەوز: بە خواردنەوە بێ یان غەرغەرە 
7- سرکە و هەنگوین: هیپۆکراتی باوکی زانستی پزیشکی پیادەی کردووە 
8- ئاوی لیمۆ (شلەتێن) و هەنگوین 
 
لەم بارانەدا سەردانی پزیشک بکە بۆ چارەسەری قوڕگئێشە: 
1- ئەگەر هەفتەیەک تێپەڕی و نیشانەکان هەر بەردەوام بوون. 
2- نیشانەکان نائاسایی و توندبوون، وەکوو پەتاکانی پێشوو نەبوون 
3- زۆر دووبارەبوونەوەی گرفتی قوڕگئێشە 
4- ئەگەر لەوانەیت کە بەرگریت لاوازە، وەکوو شەکرەی کۆنترۆڵنەکراو، تەمەنی سەروو 65 ساڵی، ئەوانەی چارەسەری دابەزاندنی بەرگری وەردەگرن وەکوو رۆماتیزمەی درێژخایەن و شێرپەنجە.