لە سعودیە بەفر باری

 

سەبارەت بەو رووداوە کە زۆر دەگمەنە لە سعودیە رووبدات، ئاژانسی فەرمی هەواڵی سعودییە-واس، ئەمڕۆ شەممە 1-1-2022 رایگەیاند، بارینی بەفر لە بەرزاییەکانی باکووری ناوچەی تەبووک، کە بە سرووشتی جوان و دڵڕفێنی ناسراوە، بووە هۆی ئەوەی چەندین خێزانی دانیشتووی ناوچەکە لە بەرەبەیانی ئەمڕۆوە بۆ گەشتیاری و بینینی بەفر روو لە ناوچەکە و چیای لۆز بکەن.

 

هاوکات ماوەی سێ رۆژە کەشوهەوایەکی سارد و باراناوی لە هەندێک شوێنیش بەفربارین هەندێک شوێنی میسری گرتوەتەوە. 

 

میدیای میسر دەڵێت، لە رۆژی پێنجشەممەی رابردووەوە پلەی گەرما لە هەندێک شوێنی وڵات دابەزیووە و لە سنووری شاری غەردەقەش بەفر باریووە. 

 

بارینی بەفر لەو ناوچانەی کە بە بیابان و بەرزیی پلەی گەرمی ناسراون وەکو سعودیە و میسر دەگمەن روودەدات؛ شارەزایانی کەشناسی دەڵێن هۆکاری ئەو رووداوە دەگمەنانە کاریگەری گۆڕانی کەشوهەوایە لە جیهان.