ئوردن ماڵپەڕە سێکسییەکان لە وڵاتەکەی بلۆک دەکات

 

رۆژی سێشەممە، 5ی ئایاری 2026، لارا خەتیب، سەرۆکی ئەنجوومەنی کۆمیسیارانی دەستەی رێکخستنی کەرتی پەیوەندییەکانی ئوردن رایگەیاند: "دەستەکە بە فەرمی سەرجەم کۆمپانیاکانی پەیوەندی ئاگادار کردووەتەوە کە دەستبەجێ دەستبکەن بە جێبەجێکردنی بڕیاری بلۆککردنی ماڵپەڕە سێکسییەکان."

 

بە گوتەی ئەو بەرپرسەی ئوردن، مەبەست لەم بڕیارە بلۆککردنی هەموو ئەو ماڵپەڕانەیە "نەگریس و سێکسیین یان پێچەوانەی یاساکانن." 

 

لارا خەتیب دەڵێ، ئەم هەنگاوە بۆ "رووبەڕووبوونەوەی مەترسییەکانی فێڵکردن، ساختەکاری و خراپ بەکارهێنانە."

 

بڕیارەکە لە لایەن بەشێک لە پەرلەمانتار و بەرپرسانی ئوردنەوە پێشوازی لێکرا. دیمە تەهبووب، پەرلەمانتاری ئوردن لە فراکسیۆنی (ئیسڵاح) پێشوازی لە بڕیارەکە کرد و لە هەژماری خۆی لە فەیسبووک نووسی: "سوپاس بۆ خودا، حکومەت بڕیاری بلۆککردنی ماڵپەڕە سێکسییەکانی دا. ئەمە داواکارییەکی گرنگ بوو بۆ پاراستنی کۆمەڵگە."

 

ئەو پەرلەمانتارە ئاماژەی بەوەش کرد، پێشتر و لە تشرینی یەکەمی 2025دا هۆشداری لە مەترسیی ئەو ماڵپەڕانە داوە و داوای لە حکومەت کردووە دایان بخات.

 

ژمارەی دانیشتووانی ئوردن نزیکەی 12 ملیۆن کەسە و بەکارهێنەرێکی زۆری ئینتەرنێتی هەیە.