بەرپرسێکی عێراق: 70 هەزار خوێندکارمان لە ئێران دەخوێنن

 

 

محەممەد نەبی ئەحمەدی، سەرۆکی زانکۆی رازی کرماشان، ئەمڕۆ 10.10.2023 گوتی، "رێککەوتننامەیان لەگەڵ 11 زانکۆی عێراقدا واژۆکردووە، ئەمەش بە مەبەستی پەرەپێدانی "هاوکارییە زانستی، پەروەردەیی، توێژینەوە و کولتوورییەکان" لەگەڵ زانکۆکانی عێراق.

 

شاندێکی زانکۆکانی عێراق کە لە رۆژانی رابردوودا سەردانی رۆژهەڵاتی کوردستان و ئێرانیان کردووە، 8 یادداشتنامەی لێکتێگەیشتنیان لەگەڵ زانکۆی لوڕستاندا واژۆ کردووە.

 

غوڵامحوسێن حوسێنی، بەڕێوەبەری گرووپی هاوکارییە زانستییە نێودەوڵەتییەکانی زانکۆی لوڕستان، رۆژی 09.10.2023 رایگەیاند: 300 خوێندکاری خەڵکی عێراق لە زانکۆی لوڕستاندا ناویان تۆمار کردووە و تاوەکو ئێستا 90 کەسیان وەرگیراون."

 

غوڵامحوسێن حوسێنی پێیوایە واژۆکردنی یادداشتنامەکانی لێکتێگەیشتن دەبنە هۆی ئەوەی "دوو لایەن توانا و بەشەکانی خوێندنی یەکدی بناسن و  زیاتر  پەرە بە هاوکارییەکانی نێوانیان بدەن."

 

یاسر عەبدولزەهرە، راوێژکاری کولتووریی عێراق لە ئێران ئاشکرای کردووە، زیاتر لە 70 هەزار خوێندکاری عێراقی لە ئێراندا دەخوێنن، بەشێک لەوان لەسەر خەرجی خۆیان دەخوێنن و هەندێکیان زەمالەی خوێندنیان هەیە.

 

بەگوتەی یاسر عەبدولزەهرە، لە ماوەی 10 ساڵی رابردوودا، بەراورد بە وڵاتانی دراوسێی عێراق، خواستی خوێندن لە ئێران لەنێو خوێندکارە عێراقییەکان زۆر زیاتر بووە.