میدیای فەرمیی ئێران: زنجیرەیەکی نوێی هێرشی مووشەکی دەستی پێکرد

 

 

میدیای فەرمیی ئێران دوای نیوەڕۆی ئەمڕۆ نزیک کاژێر 16:30 هەواڵەکەی بڵاوکردەوە.

 

هاوکات سوپای ئیسرائیل داوای لە خەڵک کرد بچنە پەناگەکان، بەتایبەتی لە شاری تەلئەڤیڤ کە لە ماوەی دوو شەوی رابردوودا ئامانجی سەرەکی هێرشەکانی سوپای ئێران بووە.

 

 

بە گوێرەی میدیای ئیسرائیل، یسرائیل کاتز، وەزیری بەرگریی ئیسرائیل لەگەڵ ئەیال زەمیری سوپاسالار و دەیڤید بارنیای سەرۆکی مۆساد (دەزگەی هەواڵگریی ئیسرائیل) و بەرپرسانی باڵای سەربازیی وڵاتەکەی کۆبووەتەوە. 

 

وەک میدیای ئیسرائیل دەڵێت، کاتز ئۆپەراسیۆنەکانی سوپا و مۆسادی لەنێو ئێران بە گرنگ ناوبردوون و داوای کردووە بەردەوام بن لە ئۆپەراسیۆنەکانیان تاوەکو زیانی گەورە بەر پڕۆگرامی ئەتۆمی، بەرگریی ئاسمانی، سیستمی مووشەکی ئێران دەگەیێنن. 

 

وەزیری بەرگریی ئیسرائیل باسی لەوەشکردووە، دەسەڵاتدارانی ئێستای ئێران سیاسەتێکی هەڵە پەیڕەو دەکەن و ئەوەش وایکردووە "تاران ببێتە بەیرووت و دانیشتووانەکەیشی ببنە بارمتە".